Suomâ lii vuolgâttâm iše Espanjan, mii lii taan keesi kámppádâllâm stuorrâ tullâpuáluiguin, sisministeriö tieđettij porgemáánu 18. peeivi. Sisministeriö miärádâs mield Suomâst lii vuálgám iŋádâhtuulâi časkâdmân spesiaališum juávkku, moos kuleh 26 puálupiälušteijed Maadâ-Savo, Tave-Savo, Maadâ-Kärjil, Tave-Kärjil já Kymileevi piäluštemlájádâsâin. Juávhu pargon lii išediđ já tuárjuđ páihálijd virgeomâháid iŋádâhtuulâi haaldâšmist já časkâdmist. Sij pargeh Espanjast suullân oho verd.
Espanja táátui iše korrâ iŋádâhtuuláid Euroop union piäluštempalvâlusmekanism peht.
– Suomâ reagistij jotelávt Espanja išetuoivuu já vuolgâttij tohon iŋádâhtuulâi časkâdmân spesiaališum juávhu. Suomâst lii EU piäluštempalvâlusmekanismist ain valmâšin iŋádâhtullâjuávkku, mon nahciis máttu puáhtá onnuđ ävkkin taan tábáhtusâst. EU-enâmeh pargeh ohtsâšpargo varriidâtmist, mii tuárju meid Suomâ varriidâttâm, muštâl sisminister Mari Rantanen.
Sisministeriö meerrid piäluštemtooimân kullee aalmugijkoskâsii iše vuolgâtmist. Piäluštempargeid škuávlee já pálkkát Piäluštemopâttâh. Ovdebái iivij Suomâ lii išedâm meccipuálui tuástumist Portugalist já Kreikkaast.
Aalmugijkoskâsâš piäluštemtoimâ vuáđuduvá staatâsopâmuššáid já lahâaasâtmân. Tot tarbâšuvvoo talle ko staatâ jieijâs naavcah iä rijttáá etitiileest. Suomâ uásálist aalmugijkoskâsii piäluštemtooimân EU já aalmugijkoskâsij ornijduumij peht. EU piäluštempalvâlusmekanism lii ohtâ tehálumosijn niävuin iše addelmân. Ton peht jeessânenâmeh pyehtih faallâđ ovdâmerkkân äššitobdee-, piäluštemjuávkku- já materiaališe.
Käldeeh:
– Suomi on lähettänyt palopelastajia Espanjaan (yle.fi)
– Suomi lähettää maastopalomuodostelman Espanjaan (intermin.fi)
Kove: Contando Estrelas (Wikimedia Commons)