Suomâ Laapin puáttee Nato-juávhui uásálistee-enâmeh láá tääl tiäđust: Island, Taažâ, Tanska, Britannia já Ranska vuolgâtteh Suomân upseerijd teikâ suáldáttijd. Ruotâ västid juávhui toimâmist já vuolgât Suomân pisovávt ovdâkoddeupseerijd. Suomâ lii juávhui iššeedeennâm. Ääšist muštâlii piäluštâsministereh 24.6. Haagist Nato njunoščuákkimist piäluštâsministerij ehidâsmállásij ääigi.
– Taat addel kievrâs viestâ tast, ete Euroop kuáddá ovdâsvástádâs Natost, já áášánkullee jeessânenâmeh láá valmâšeh nanodiđ littokode paldattâs já piäluštâs tavekuávluin, iätá piäluštâsminister Antti Häkkänen (Kokoomus).
Äšši lii sundáttâllum kuhháá, já máhđulij uásálisteiguin lii ráđádâllum jo paijeel ive. Ruotâ piäluštâsminister Pål Jonson muštâlij Ylen tolebiššáá njunoščuákkimist, ete Taažâ áigu uásálistiđ haahân. Britannia vist muštâlij jieijâs uásálistmist vyesimáánust.
– Ohtsâšpargo Ruotáin lii moonnâm eromâš pyereest, já mij lep iloliih tast, ete valmâštâllâm uásálistee-enâmij uásild lii ovdánâm vuávám mield, Häkkänen muštâl tiäđáttâsâst.
Juávhuh sajaduveh Ruávinjaargân já Suáđigilân
Suomâ lii meridâm, ete Nato-juávhuh sajaduveh Ruávinjaargân já Suáđigilân. Tuše uccâ uásáš juávhuin pääcih Suomân pisovávt. Ruotâ piäluštâsminister Jonson muštâlij tolebáá kesimáánust, ete stuárráámus uási juávhuin tuše iäláččii hárjuttâlmin Laapist. Vuosmuuh hárjuttâsah láá vala taaijuv.
Juávhuh láá nuuvt kočodum FLF (Forward Land Forces) -eennâmvyeimijuávhuh. Toi ulmen lii estâdiđ Ruošâ volliittem já muštottiđ, ete volliittem oovtâ Nato-enâmân meerhâš volliittem puoh jeessânenâmáid. Suomâ lasseen FLF-juávhuh láá meiddei Bulgariast, Eestienâmist, Uŋgarist, Latviast, Liettuast, Puolast, Romaniast já Slovakiast. Toid kuleh suáldátteh maaŋgâin enâmijn.
Suomâ nubbe Nato-ovdâkodde puátá Mikkelin. Toos puátih upseereh Suomâst, Ruotâst, Taažâst, Tanskaast, Vuáládâhenâmijn, Britanniast já Ovtâstum staatâin.
Käldeeh:
– Suomen Nato-joukkojen kokoonpano on selvillä: Pohjoismaat, Britannia, ja Ranska lähettävät sotilaitaan Lappiin (yle.fi)
– NATO’s military presence in the east of the Alliance (www.nato.int)
Kove: Jacob Connor (Wikimedia Commons)