Maailm katolilâš kirkko tollij vuoiŋâmis já vuordij tiäđu uđđâ paavist, ko tuorâstâheehid 8.5. Sikstus kappel poccest paijaanškuođij vielgis suovâ ton merkkân, et uđđâ paavi lii väljejum. Paavin väljejui kardinaal Robert Prevost (69), kote valjij paavinommânis Leo XIV. Sun lii vuosmuš ameriklâš paavi.
Prevost lii šoddâm Chicago kaavpugist Ovtâstum staatâin. Sun finnij kanonisii laavâ tuáhtár áárvu Rooma Pase Tyemes Akvinolii paavilii ollâopâttuvâst ive 1987. Sun kulá augustinolâšnjuolgâduskoodán. Sun vihkui pappân ive 1982. Sun lii porgâm Vatikaan Läättinlii Amerik komissio hovdân ive 2023 rääjist. Tađe ovdil sun poorgâi Perust, kost sun tooimâi Chiclayo pispen ivij 2015–2023. Paavi Franciscus nomâttij suu kardinaalin ive 2023.
Prevost lâi mottoomnáál olâttâsvaljim, tastko suu ameriklâšvuotâ onnui maŋgâs mielâst eestân suu valjiimân. Sun ij lam nomâttum kievrâmui paavikandidaatij nommân ollágin. Sust lii ennuv stivrimhárjánem, já sun lii pyeri ráđádâllee. Sun sárnu njyebžilávt eŋgâlâskielâ, italiakielâ já espanjakielâ.
”Ráávhu liävus tiigijn” lijjii uđđâ paavi vuosmuuh säneh ulmuid, kiäh čuožžuu Piättár avgâdâsâst suu vyerdimin. ”Paa ij vyeiti… Palottáá mij väldip vuástá Immeel já juátkip oovtâst”, uđđâ paavi luuvâi pápárist. ”Maailm taarbâš Kristus, já mij kolgâp puohah išediđ kuáimán.”
Paavi kiijtij kardinaalijd, kiäh čokkânii Sikstus kappelân valjiđ uđđâ paavi. Koŋklaav algâttij paavi valjim koskoho ehidispeeivi. Uđđâ paavi väljejui niäljádáin jienâstmáin. Koŋklaavist 133 kardinaalid jienâstii uđđâ paavi valjiimist. Jo maaŋgah maailm njunošeh láá tuáivuttâm uđđâ paavin luho sosiaallii mediast. Kardinaal Prevost lii historjá 267. paavi.
Käldeeh:
– PREVOST Card. Robert Francis, O.S.A. (press.vatican.va)
– Uusi paavi on amerikkalainen Robert Prevost — paavina hänen nimensä on Leo XIV (www.kotimaa.fi)
– Amerikaan Robert Prevost (69) is nieuwe paus Leo XIV • Felicitaties van wereldleiders (nos.nl)
Kove: Eja Encontro Juvenil Agostiniano Agostiniano (Wikimedia Commons)