Suomâ evaŋgellâš-luuteerlâš kirkko uárnee Sämmiliih kirhoost – Sä’mmla ceerkvest – Sápmelaččat girkus – Saamelaiset kirkossa -haavâ lopâttemimmeelpalvâlus Tuurku tuámukirhoost tuorâstuv vyesimáánu 8. peeivi tijme 19.
Sämmiliih kirhoost – Sä’mmla ceerkvest – Sápmelaččat girkus – Saamelaiset kirkossa -haahâ lii pištám kyehti ive. Tom lii ornim Suomâ evaŋgellâš-luuteerlii kirho pispečuákkim, já ton ulmen lii lamaš meddâlistiđ máhđulijd kelduid sämmilij já kirho kooskâst. Haahâ nohá immeelpalvâlusân, mii uárnejuvvoo Tuurku tuámukirhoost já mii ana sistees katâmâš já sovâdâs tavo sämmilij kuáttá.
– Sämmilijn já evaŋgellâš-luuteerlii kirhoost lii kuhes já maaŋgâmuđusâš historjá. Munjin lii tehálâš, ete mij lep mieldi čäittimin kunnijâttem taan tábáhtusân. Jyehi sämmiliist lii máhđulâšvuotâ väldiđ vuástá kirho oovdânpyehtim katâmâš já sovâdâs tavo jieijâs vuolgâsoojij mield, iätá saavâjođetteijee sajasâš Tuomas Aslak Juuso.
Sämitige saavâjođetteijee sajasii lasseen immeelpalvâlusân uásálistev I värisaavâjođetteijee Leo Aikio já saavâjođetteijee sajasâš Niina Siivikko. Sämitige jesâneh Tauno Ljetoff já Ulla-Maarit Magga lává toimâm haavâ stivrimjuávhust, mon pispečuákkim lii nomâttâm.
– Lâi stuorrâ kunnee uážžuđ leđe mieldi haavâ stivrimjuávhust já antologiapargoost. Haavâ ääigi lâi ilo huámmášiđ, maht taat haahâ lii finnim kijttosijd já kunnijâttem miätá oles kirho. Tuáivu mield puátteevuođâst sämmiliih puávtáččii leđe oovtâviärdásiih kirho jesâneh jieijâs vuolgâsoojij mield. Mun tuáivum meid, ete taat haahâ já onnáš immeelpalvâlus taheh jieijâs uásild máhđulâžžân meid addâgâsân adelem, iätá Tauno Ljetoff.
Sämitige čuákkim finnij tiättun Sämmiliih kirhoost -haavâ äigikyevdilijd aašijd cuáŋuimáánu 14. peeivi 2025. Čuákkim kuulâi äššitobden proojeektkoordinaattor Mari Valjakka já sämmilâšpargo čällee Erva Niittyvuopio.
Haavâ lopâttemtilálâšvuođah lijjii Hettaast 23.3.2025 já Anarist 24.3.2025. Sämmilij päikkikuávlu servikodeh láá ornim sáátu Tuurku tuámukirho lopâttemimmeelpalvâlusân.
Immeelpalvâlus lii puohháid áávus, já tom puáhtá čuávvuđ virtuaalkirho peht.
Käldee:
– Sämitigge uásálist Sämmiliih kirhoost -haavâ lopâttemimmeelpalvâlusân Tuurkust (samediggi.fi)
Kove: Mauri Suhonen (Wikimedia Commons)