Neeljis láá valdum kiddâ Keniast eksootlij kuđhâi syelifievridem keežild. Sij irâttii syelifievridiđ kuuđhâid olgos enâmist. Tivreh lijjii čiehhum smavvâ tuubijd, main taid puovtij siäiluttiđ kyehti mánuppaje.
The Kenya Wildlife Service (KWS) muštâl, et koččâmušâst lijjii nuuvt kočodum Messor cephalotes -kuuđhah ađai taggaar kutkâšlaajâ, mii kávnoo tuše Etiopiast, Tansaniast já Keniast. KWS-organisaatio suoijâl táválávt stuorrâ elleid tego leijonijd já elefantijd, mut taan tove tot sárnu eromâš tiileest.
Messor cephalotes -kuuđhah láá halijdum elleeh čuággei koskâvuođâst taan kutkâsoortâ eromâš lattim keežild. Taah kuuđhah mättih huksiđ muálkkáás siärváduvâid, já tondiet toh láá pivnoheh formikariumijn, moh láá eromâš kutkâakvaarioh. Ton lasseen taat kutkâsorttâ lii eromâš pyeri háittuellei tuástumist ovdâmerkkân šaddoviistijn. Anarâš aavis nettitutkâmij mield kutkâroonnig já 1–5 pargeekuuđhâ mäksih käävpist suullân 250 eurod, mut kavpâšeijee ferttee tiiláđ kuuđhâid, já tiilájeijee finnee tastoo tiäđu, kuás kuuđhah pyehtih toimâttuđ.
Kyevtis kiddâvaldum ulmuin puáttiv Belgiast, ohtâ Vietnamist já ohtâ Keniast. Sij láá puohah mieđettâm áigumušâidis Nairobi tuámustoovlist. Lii vala epičielgâs, maggaar ráŋgáštâs sii lii vyerdimin. Keniast kuđhâi kavpâšem ij lah kieldum, mut tot lii liijká korrâsávt stivrejum. KWS sárnu ”biopiratismist” taan tááhust. Taat uáivild biologisii materiaal kávpálii nistem teikâ enâmisttuálvum toin naalijn, et vuolgâeennâm ij tast mahten hieđâ. Biologisâš materiaalin annojeh ovdâmerkkân šadoh, elleeh já mikro-organismeh.
Arvâlusâi mield taah kuuđhah lijjii monâmin Euroopân já Aasian kävppikálvun toorijd, moh vyebdih eksootlijd päikkielleid.
Käldee:
– Vier arrestaties in Kenia voor smokkel van exotische mieren (nos.nl)
Kove: negahuk (Pixabay)