Tot, kote áigu uápásmuđ taiđui já kulttuurân Pariisist, kárttá forgâ mäksiđ mäđhistis eenâb. Ranska haldâttâh lii áigumin pieijâđ siisâpeessâmmáávsu Notre-Dame kiirkon Pariisist. Taan räi kiirkon lii peessâm nuuvtá. Meiddei Louvre-museo siisâpeessâm tivro motomáid tuuriistjuávhoid. Ranska kulttuur- já ärbisajeminister Dati lii tieđettâm ääšist kieskâd.
Minister Dati čielgee, et Ranska kirhoh já historjáliih monumenteh láá uáli jo hyenes oornigist. Taid ferttee tivvoođ teikâ joba renovistiđ, mut Ranska haldâttâh lii eidu šeštimin korrâsávt.
”Mii ärbisojij paijeentolâmân tarbâšuvvoo ennuv ruttâ”, Dati čielgee. ”Viäruid puáhtá pajediđ, mut tast-uv lii rääji.” Tastko eres ruttâdemmáhđulâšvuođah iä lah, te talle kuállejeijeeh ferttejeh mäksiđ eenâb.
Symbollâš summe siisâpesâmist
Minister Dati lii virgálávt iävtuttâm, et Notre-Dame katedraalân siisâpesâmân ličij symbollâš máksu turistáid. ”Tom ruuđâ puáhtá talle kevttiđ oskolduvlij monumentij piäluštmân. Jis mij peerrâp vittâ euro jyehi kyesist, te taat smavvâ summe puáhtá 75 miljovn eurod siisâ jyehi ive. Toin naalijn Notre-Dame piäluštičij puoh kirhoid Ranskaast.”
Dati haalijd meid pajediđ siisâpeessâmmáávsuid museoid tiätu juávhoid. ”Lii-uv tot olmânáál, et ranskalâš kyessi máksá siämmáá ennuv Louvre-museon siisâpesâmist ko ovdâmerkkân brasilialâš tâi kiinalâš kyessi?” Sun haalijd, et Euroop union ulguupiälásiih kyesih mávsáččii eenâb museost kolliistâlmist. Sun haalijd uđđâ njuolgâdusâid vuáimán jo uđđivemáánu aalgâ rääjist.
Siisâpeessâmmáávsust láá maaŋgah uáivileh. Máávsui kyeditteijeeh eteh, et eres-uv pegâlmâs kirhoh peerih siisâpeessâmmáávsu kiirkon puátimist. Ovdâmerkkân Barcelona Sagrada Familia siisâpeessâmmáksu lii 26 eurod per kyessi, já Lontoost leijee Westminster Abbey uksâ lekkâs 30 pundáin. Pastor Olivier Scache pelestis čielgee, et kulttuur já osko kalgeh leđe puohháid nuuvtá finniimist.
Notre-Dame kirkko lekkâs oppeet juovlâmáánust kuossijd. Tot lii lamaš kiddâ ive 2019 pyellim rääjist.
Käldee:
– Toeristen laten betalen voor Notre-Dame? ’Kan alle Franse kerken redden’ (nos.nl)
Kove: ian kelsall (Pixabay)