Kieskâd jáámmám kunâgâs Tūheitia Pōtatau Te Wherowhero VII nuorâmus pärni já áinoo nieidâ, 27-ihásâš Ngā Wai Hono i te Pō, lii väljejum māorij uđđâ kunâgâtârin. Sun kočoduvvoo meid ”uđđâ iiđeedkuoksun”. Valjim toovâi juávkku, mast lijjii fáárust kyehtnubáloh puárásub māorialmajid jieškote-uvlágánijn čeerdâin. Ngā Wai Hono i te Pō nomâttui uđđâ kunâgâtârin Ngāruawāhiast čohčâmáánu 5. peeivi.
Ngā Wai Hono i te Pō lii Kīngitanga-lihâdâs nubbe kunâgâtâr já káávcád moonaark. Sun lii meid māorij nubben nuorâmus moonaark, mii lii kuássin nomâttum. Monarkist ij lah lavâlâš miärádâsväldi Aotearoast ađai Uđđâ-Seelandist, mut sun lii maaŋgâi māoričeerdâi alemus hovdâ. Kīngitanga vuáđudui ive 1858, já tot lii ovtâstittâm Aotearoa māoričeerdâid taistâlmist brittilij kolonialismvääldi vuástá. Lihâdâs ulmen lii māorij kielâ, kulttuur já enâmij siäiluttem. Ngā Wai Hono i te Pō lii māorij vuossâmuu kunâgâs njuolgâ maajeeldpuáttee. Sun lii māorij ärbivuáválii tikanga-laavâ maister Waikato ollâopâttuvâst já lii porgâm māorikielâ iäláskittem pyerrin.
Siämmáá seremoniast, mast uđđâ kunâgâtâr nomâttui, hävdidui oovdiš kunâgâs Tūheitia Pōtatau Te Wherowhero VII. Sun jaamij porgemáánu 30. peeivi pyecceiviäsust váimučuopâdâs maŋa 69-ihásâžžân. Sun lâi lamaš māorij kunâgâs ive 2006 rääjist.
Māorih láá eidu tääl vaigâdis tiileest, tastko Aotearoa kuávdáš-uálgispiäláduv haldâttâs lii komettâm ovdebij haldâttâsâi miärádâsâid, moiguin lâi viggum māorikielâ nanodem, algâaalmugij eellimtile pyeredem sehe tagarij puástuvuođâi njuolgim, moh brittikolonialism ääigi tahhojii māorijd.
Käldeeh:
– Maorit saivat uuden aamunkoiton kuningattaren ja hautasivat vanhan kuninkaan perinteisin seremonioin (yle.fi)
– Hun er yngste barn og eneste datter (www.nrk.no)
– Māori queen Nga Wai Hono i te po Paki crowned in ‘new dawn’ for New Zealand (www.theguardian.com)
– The new Māori Queen: Kuini Nga wai hono i te po, 27, to succeed her father Kiingi Tuheitia as Māori monarch (www.rnz.co.nz)
Kove: DoD photo by Erin A. Kirk-Cuomo (Wikimedia Commons)