Amerik oovdiš president já tááláš presidentkandidaat Donald Trump hávádui uálgispiäljásis ton keežild ko sun šoodâi morheirâttâs moolân kampanjateivâdmis ääigi Pennsylvaniast lávvárdâheehid. FBI mield saahâ lii morheiiskâstmist.
Ohtâ Trump kyeditteijee jaamij päčimist. Kyevtis lává ruásnulum viärráht.
Syeligâs palvâlus almoot, et 20-ihásâš almai päjiškuođij Trump kulij ollâ saajeest tábáhtumesaje ulguubeln. Tárkkápäččee paajij taam almaa masa tállân morheiskâstem maŋa jaamâs. Almaa motiiv lii vala tubdâmettum.
”Leemnâ teivâsij muu peelji paajaakiäčán”, Trump tieđettij vuosâreaktiostis. ”Mun tiettim, et miinii lâi sattum, tastko mun vistig kuullim, et miinii kiirdij lappâd já tastoo tubdim, ko leemnâ moonâi muu liške čoođâ. Oinim ennuv voorâ, nuuvt et tiettim, mii lâi tábáhtum.”
Oovdiš president lâi koskâiijâ maŋa (Suomâ ääigi) tolâmin saavâ Butler-nommâsii kaavpugist, ko päčimeh kulluuškuottii. Trump njavhâstij peeljis, koskâldutij saavâs já nutâgij vuálus suáján. Kuldâleijeeh Trump tyehin meid nutâgii.
Mottoom ääigi keččin torvoalmaah tolvuu Trump autoin meddâl. Sun eelij ton maŋa pyecceiviäsust. Trump lii tieđettâm, et sun vaja pyereest já sun lii jo peessâm pyecceiviäsust.
Käldee:
– Trump geraakt aan oor bij moordaanslag tijdens campagnebijeenkomst (nos.nl)
Kove: Gage Skidmore (Wikimedia Commons)