Jyelgipáálu almai euroopmiäštárkištoh láá ovdánâm niäljádâsfinaláid

Jyelgipáálu almai euroopmiäštárkištoh láá joođoost Saksaast, já Euroop käävci pyeremussân juávkkud láá peessâm niäljádâsfinaláid.

Kočâttemspeelah algii lávurduv kesimáánu 29. peeivi tijme 19.00, ko Sveicci vuoitij Italia, mii lâi haldâšeijee Euroop miäštár. Saksa já Tanska spellii nubijdis vuástá siämmáá eehid tijme 22.00. Saksa vuáittu taan speelâst piejâi joton savâstâlmijd já kritiikijd tuámárij miärádâsâin já videotuámárij tarbâšlâšvuođâst.

Čuávuvâš peivi puovtij fárustis uđđâ speelâid. Tijme 19.00 aalgij Eŋland já Slovakia koskâsâš spellâ. Slovakia lâi jo vyeittimin speelâ 1–0 ovdilgo täsnispellee Jude Bellingham čievčâstij moolâ spellâmääigi majemuu minuttist. Jotkâääigi Harry Kane čievčâstij vuáittumoolâ, já nuuvt Eŋland kočâttij Slovakia meddâl kištoin. Siämmáá eehid spellui meiddei Espanja–Georgia, mon Espanja vuoitij älkkeht 4–1.

Syeinimáánu 1. peeivi Ranska vuoitij Belgia 1–0 Jan Vertonghen jieijâs mooláin tijme 19.00 álgám speelâst. Tijme 22.00 Portugal já Slovenia spelleeh lävkkejii kiedi oolâ, já Portugal–Slovenia spellâ aalgij. Spellâ lâi täässiv, já tot moonâi-uv jotkâááigán. 105. minuttist Slovenia molâvahtâ Jan Oblak tuástui Portugal täsnispellee Cristiano Ronaldo ráŋgáštâsčievčâstem. Meiddei Portugal molâvahtâ Diego Costa peesâi piäluštiđ päikkienâmis, ko sun tuástui slovenialii volliitteijee Benjamin Šeško molâmáhđulâšvuođâ 115. minuttist. Vyeittee speelân ij kavnum jotkâääigigin, te speelâ koolgâi čuávdiđ ráŋgáštâsčiehčâmijguin. Portugal molâvahtâ Costa tuástui Slovenia puoh kulmâ irâttâs, já nuuvt Portugal vuoitij speelâ.

Syeinimáánu 2. peeivi vuossâmustáá spellii Romania já Holland. Holland lopâttij Romania tuoivuid kištoin ovdánmist 3–0 vuáittoin. Tijme 22.00 Turkki já Nuorttâriijkâ algâttii speelâs, mon Turkki vuoitij 2–1.

Čuávuvâžžân kištoin spiällojeh niäljádâsfinaleh. Spellâpaarah láá jo tiäđust. Espanja já Saksa spellih syeinimáánu 5. peeivi tijme 19.00. Siämmáá eehid tijme 22.00 lii Portugal já Ranska vuáru. Syeinimáánu 6. peeivi Eŋland spiällá Sveeici vuástá tijme 19.00, já tijme 22.00 spellih Holland já Turkki. Puoh speelah čáittojeh Yle TV 2 -kanavast já Yle Areenast.

Käldee:

– Katso tästä jalkapallon EM-kisojen koko ohjelma ja lähetysajat (yle.fi)

Kove: Peter Weihs (Wikimedia Commons)

Kommenteh

Čääli komment

Čääli komment.
Čääli noomâd teehin.

Luuvâ meid

Uđđâsumos uđđâseh

Kappeer­pingviineh Zavo­dovski suol­lust láá kiäp­pán­min

Stuorrâ-Britannia aalmuglii Antarktis-tutkâmlágádâs BAS (eŋg. British Antarctic Survey) totkeeh láá tutkâm máddáápiäláá Atlant váldumeerâst leijee Zavodovski suolluu iivij 2011 já 2025. Brittiliih totkeeh muštâleh,...

Suomâ, Taažâ já Kanada räije­jeh ryeš­šilij valas­tellei viisu­mijd

Suomâ haldâttâs meridij tuorâstuv staatârääđi almosčuákkimist, ete tot čavgee viisumij mieđettem ryeššiláid valastelleid. Suomâ olgominister Elina Valtosii (kok.) mield Ruoššâ kiävttá valastâllâm propaganda koskâuámmin. –...

Anarâškielâ servi almostit kyehti párnái­kirje skammâ­máánust

Anarâškielâ servi lii juátkám párnái- já nuorâikirjij almostittem. Tot almostit kyehti kirje 40‑ive juhlij ohtâvuođâst. Mainâsij ihe – Ijâttes ijjâ Vuosmuš tääl almostuvvee kirje lii párnái...

Kollekielâ-palhâ­šume mieđet­tui emeritus­professor Nils Øivind Helan­derân

Taankiärdásâš Kollekielâ-palhâšume lii mieđettum emeritusprofessor Nils Øivind Helanderân. Palhâšume mieđettui sunjin kuhes já maaŋgâpiäláág eellimpargoost sämikielâi oovdedmist. Palhâšume keigejui sunjin Helsigist skammâmáánu 11. peeivi....

Suomâ šoŋŋâ­dâh lii lieg­gân­min torvo­lii rääji paijeel

Taan ive keesi lâi vaigâd Euroopân. Koskâ- já Maadâ-Euroopist lijjii korrâ pakkâpajeh, juuvah kuškii já sehe elleeh já ulmuuh killájii. Pakkâseh maksii Euroopân joba...