Aanaar kieldâ tieđeet, et ton stivrimjuávkku lii oovtâst Inergiain valmâštâllâm värivuávám máhđulij muuneeld vuávájum šleđgâpođhâi várás.
Ubâ Suomâ šleđgâtile haaldâš vuáđuviermifinnodâh Fingrid, mii rävvee šleđgâviermifinnoduvâid páihálij šleđgâpođhâi tooimânpiejâmist, jis uáinusist lii šleđgâvänivuotâ. Šleđgâpoođhah hettiiččii ulmuu aargâ máhđulávt argâpeivij tijme 7–10 já tijme 16–20 ađai huššâpudâi ääigi. Šleđgâpoođhah pištáččii maksimaallávt kyehti tiijme häävild. Máhđulâšvuođâi mield šleđgâpoođhâst tieđettuuččii ulmuid jo ovdebáá eehid. Táválii asâmist tággáár poođhâ ääigi ovdâmerkkân čääsi kulâttem kolgâččij velttiđ nuuvt ennuv ko máhđulâš.
Sosiaal- já tiervâsvuotâpalvâlusâi uásild tiervâsvuotâkuávdáást lii värivyeimimaašin, nuuvt et tobbeen já meiddei pehtilittum palvâlemaassâm ohtâduvâin toimâ juátkoo táválávt. Päikkitipšoost tagareh ulmuuh, kiäh tarbâšeh eellimtoimáid tehelijd šleđgâruustigijd teikâ išepiergâsijd, sirdojeh táárbu mield tiervâsvuotâkuávdážân šleđgâpođhâi ááigán. Pargeid finnee ain ohtâvuođâ šleđgâpođhâi ääigi-uv.
Meiddei škoovlah já arâpajasšoddâdem láá rahttâttâm šleđgâpođháid. Škoovlah iskeh toimâđ šleđgâpođhâi ääigi táválávt, mut máttááttâs siskáldâs sáttá kuittâg muttuđ. Škovlâmääđhih pyehtih tábáhtuđ sevŋâdâsâst-uv kátučuovâittáá, mut talle jotemist kalga leđe eromâš várugâs. Purrâmušpalvâlus Kaarre kievkkân rahttât šleđgâpođhâi várás muulsâiävtulij purrâmušâi falâmáin.
Kieldâ pyereed rahttâttâm šleđgâpođháid ei. rähtimáin váiloo värivyeimilahtemijd kriittisáid soojijd sehe tot áigu skappuđ uđđâ värivyeimimaašin.
Tuáimei uáinust lii tehelâš vuáváđ jo muuneeld toimâmvuovijd spiekâstâhlii ääigi. Inergia tieđeet máhđulijn poođhâin ain ko tot lii máhđulâš. Jis šleđgâvänivuotâtile itá paifakkist, ovdâmerkkân mottoom vave tiet, te tast ij ain lah máhđulâš tieđettiđ muuneeld. Inergia vahetiäđáttâsah láá nuuvtá puoh äššigâssáid, já taid lii máhđulâš tiiláđ jieijâs puhelimân Inergia viermisiijđo peht čujottâsâst www.inergia.fi > OmaInergia.
Lii pyeri mušteđ, et jyehi olmooš puáhtá estiđ šleđgâvänivuotâtile šoddâm keeppidmáin šleđgâkevttim jieijâs aargâst.
Käldeeh:
– Kysymuksiä ja vastauksia mahdollisesta sähköpulasta (www.inergia.fi)
– Kunta varautuu sähkökatkoihin (www.inari.fi)
– Tietoa sähköpulasta (www.fingrid.fi)
Kove: 0fjd125gk87 (Pixabay)