Amerik puárásumos olmooš Bessie Hendricks lii jáámmám, muštâl uđâstoimâttâh Reuters. Hendricks jaamij uđđivemáánu 3. peeivi.
Hendricks juhloi jieijâs 115. šoddâmpeeivi vala skammâmáánu 9. peeivi 2022. Sun lâi šoddâm ive 1907. Sun naajâi ive 1930 já finnij vittâ párnáá. Kyevtis suu párnáin kiergânáin jäämmiđ ovdil eenis. Suu käälis Paul jaamij mánuppaje ovdil sunnuu 65. hejâpeeivi ive 1995.
Sun kiergânij elimis ääigi uáiniđ 21 Amerik presidentid, kyehti maailmsuáđi já Titanic vuáijum.
Ton lasseen, et Bessie Hendricks lâi Amerik puárásumos olmooš, sun lâi meiddei maailm statistik mield niäljádin puárásumos olmooš.
Suu nieidâ Joan Shaffer, kote teevdij 90 ihheed peeivi ovdil eenis 115. peeivi, lâi kijttevâš, et suu enni eelij nuuvt kuhháá.
Kuhes eellim syeligâsvuotâ kavnui Bessie Hendricks muštâlem mield korrâ pargoost, sun muštâlij sahhiittâlmist The Messenger ‑lostáin ko sun teevdij 110 ihheed. Suu nieidâ muštâlij, et eenis lâi avžum karveđ tuáhtárijd mut ij pajalâšâid ige šoddâmpeivikááhuid, maid sun rähistij kaandâs Leon Hendricks mield.
Hendricks vaanhimijn lâi šiiveettáálu, já sun išádâlâi päikkipargoin jo uccevuođâ rääjist. Sun meid poorgâi máttáátteijen mut liijká viljâlij kálláinis eennâm já suoi tooláin šivettijd.
Amerikist puoh puárásumosin iällám olmooš lii lamaš Sarah DeRemer Knauss, kote eelij 119 ihheed já 97 peivid. Cuáŋuimáánu 16. peeivi 1998 sust šoodâi ubâ maailm kuhemustáá iällám olmooš.
Hendricks maŋa Amerik puárásumos ellee olmožin šoodâi kalifornialâš Edie Ceccarelli, kote teevdij 115 ihheed kuovâmáánu 5. peeivi.
Käldeeh:
– The oldest living person in the US just turned 115 (www.edition.cnn.com)
– Happy 112th (www.messengernews.net)
– Iowa woman believed to be the oldest person in the US dies at 115 (www.edition.cnn.com)
Kove: H. Hach (Pixabay)