Suomâ lii kiddim puohnâssân nelji rääjirastaldittemsaje Suomâ já Ruošâ koskâsii rääji alne vástuppeeivi já lávvárduv vuástásii iijâ. Kiddejum rastaldittemsajeh láá Niirala, Imatra, Vaalimaa já Nuijamaa. Áávus láá jotoluv várás ain kyehti rastaldittemsaje: Vartius já Salla. Suijân kiddiimân lii tot, et majemui aigij rääjirastaldittemsoijij peht Suomân láá puáttám eenâb torvopääihi occeeh Ruošâ peln, motomeh sist tuolmâmpyeráin teikâ čiehčâmluovdijn teikâ vääzin. Táválávt puáttein iä lah lamaš äššikirjeh oornigist.
Meiddei Vartius rastaldittemsaje lii kiddejum mottoom tove koskâpuddâsávt tondiet ko Ruošâ virgeomâhááh láá stivrim torvopääihi occeid Suomân já kiddim rääji sii tyehin toin naalijn, et ulmuuh iä lah innig luoštum maassâd Ruošân. Kainuu räjikosáttâh muštâl, et puátteeh láá vuosâtiäđui mield lamaš nuorâ almaah Syyriast, Somaliast, Marokkost, Egyptist já Etiopiast. Maaŋgah sist láá räjikosáttuv mield orostâllâm kuhheeb ääigi Ruošâst, kuus sij láá aalgâaalgâst puáttám lavâlávt. Ruošâ pele uáinu mield sist iä lah máhđulâšvuođah estiđ kuálmád enâmij ässei puáttim Suomâ rääji kuuvl, muštâl Maadânuorttâ-Suomâ räjikosáttuv komendeijee, eeveerst Mika Rytkönen Ilta-Sanomaid. Meiddei muádilov ulmuu juávhuh láá irâttâm peessâđ Ruošâst Suomân mađhâšemäššikirjijttáá, iäge sij lamaš uuccâm torvosaje Suomâst. Maŋeláá sij kale láá pieijâm siisâ torvosajeucâmušâid.
Rautjärvi kuávlust Maadâ-Kärjilist kyevtis lává rastaldittám väldikode rääji lovettáá já neeljis estui čoođâ Nuijamaast. Ääšist muštâl Maadânuorttâ-Suomâ räjikosáttâh viestâpalvâlus X:st. Räjikosáttuv mield staatâräjirikkoos tutkâm ääigi taah kyevtis ussáin aalmugijkoskâsii suojâlem. Räjikosáttuv mield mihheen ij kuittâg čuujoot ton kulij, et räjikuávlust eennâmrääji alne liččii eenâb Suomân viggee torvopääihi occeeh.
Vartiusân lii pasepeeivi ääigi puáttám virgeiše Piäluštemvuoimijn koskâpuddâsij estui huksiimân. Virgeiše lii puáttám meid Oulu poolislágádâsâst. Suomâ ulmen lii tääl lopâttiđ nuorttârääji kulen vuottum almoon, mii lii sirdum Vartiusân maadânuorttii rääjirastaldittemsojij kiddim keežild.
Suomâ Räjikosáttâhlágádâs mield nuorttârääji rääjirastaldittemsoijijd láá kuođđum lávvárduv paijeel 70 torvosajeucâmuššâd. Vástuppeeivi torvopääihi occeeh nuorttârääji kulen lijjii ohtsis 220.
Räjikosáttuv tutkâmijn láá vuottum meerhah tast, et uási ulmuin viggeh Suomâst olgos Schengen kuávlun.
Käldeeh:
– Tällainen oli yö kaakkoisrajalla (www.is.fi)
– Itärajalla nähtiin poikkeuksellinen tilanne – näin härskisti venäläisviranomaiset toimivat nyt Vartiuksen rajanylityspaikalla (www.is.fi)
– Rajavartiosto: FSB:n rajavartiopalvelu ei huoli ihmisiä takaisin Venäjälle – Neljä pääsi esteiden läpi Suomeen Nuijamaalla (www.hs.fi)
Kove: Hans Põldoja (Wikimedia Commons)