MEP Sirpa Pietikäinen čáálá uđâsreivâstis 6.10.2023, et Euroop parlament lii jienâstâm uáinustis siärváduv tuolvâčasij kieđâvušmân kyeskee direktiivist. Komissio iävtuttij direktiiv uđđâsistlehâstem, tastko tááláš direktiiv lii paijeel 30 ihheed puáris. Koččâmušâst lii viehâ stuorrâ direktiiv, tastko tot miäruštâl, maht já magarij räjiárvuigijn EU-enâmij kieldah já aassâmsajeh kalgeh huolâttiđ tuolvâčasijdis putteestmist (ovdâmerkkân tyypi já fosfor räjiáárvuin).
Iävtuttâs ulmen lii turviđ ulmui já ubâ pirrâs tiervâsvuođâ siärváduv tuolvâčasij tovâttem riiskâin já luoštuin. Huolâmettumávt teikâ hyeneeht putestum tuolvâčääci lii ohtâ čácáduvâi stuárráámuin nyeskideijein já njivlejeijein. Tot siskeeld meid ulmui háitulijd kemikaalijd já mikrobijd, moh sättih njuolgist teikâ epinjuolgâdávt vaiguttiđ negatiivlávt tiervâsvuotân. Tondiet kalga visásmittiđ, et siärváduv tuolvâčäcilágádâsah putesteh kevttimčääsi nuuvt pehtilávt ko máhđulâš.
Tuolvâčasij putestem lii eromâšávt Nuorttâmeerâ uáinust tehelâš, tastko mii merâsaivâ lii ohtâvuođâst väldimeerân tuše smavvâ čuálmi peht, já tondiet tot lii eromâš herkki nyeskivuotân. Nuorttâmeerâ lii jo valmâšin tuolvâm já tot vaja hyeneeht. EU-vijđosâš lahâasâttâs tuolvâčääsi putteestmist ij vaaigut tuše mii jieččân čäciputteestmân mut meiddei Puola Nuorttâmeerân lyeštim tuolvâčassijd. Puttásub Nuorttâmeerâ lii puohháid ävkkin.
Käldee:
– Jätevetemme on puhdistettava tehokkaasti (www.sirpapietikainen.net)
Kove: 5056468 (Pixabay)