Jyehi-ihásâš Säminuorâi taaiđâtábáhtus uárnejuvvoo puáttee ive Heta škoovlâst Iänuduvvâst cuáŋuimáánu 29. peeivi. Iänuduv kieldâ tiävdá puáttee ive 150 ihheed, já taaiđâtábáhtus lii uási juhleive tábáhtuskalenderist. Almottâttâm tábáhtusân lekkâs algâivveest 2027. Sämitigge tieđettij ääšist jieht.
Ive 2027 taaiđâtábáhtus teemah láá teatter, naamar já čuovâkuvvim.
Teatterist uásálisteeh rähtih enâmustáá love miinut lávdástem, mii puáhtá vuáđuduđ sämimainâsân, mottoom páihálii áášán, klassiklii párnáimainâsân tâi aaibâs uđđâ kietâčallui. Naamarteeman vist kulá jieijâs naamar rähtim.
Čuovâkuvvim lii juohhum kuulmâ ahejuávkun. 6–9-ihásij pargon lii kuvviđ ilo. 10–12-ihásiih vist viggeh kavnâđ maidnii, maid iäráseh iä veltihánnáá hoksáá. 13–19-ihásij pargokovveen lii rähtiđ kuulmâ kove rááiđu taidâr jieijâs uáinust.
Láávdástmij, naamarij já čuovâkuuvij tärhibijd vátámušâid puáhtá luuhâđ Sämitige tiäđáttâsâst.
Säminuorâi taaiđâtábáhtus uárnejuvvoo jyehi ive Säämist. Ton ulmen lii faallâđ säminuoráid areena jieijâs tááiđui oovdânpyehtimân. Siämmást puáhtá teivâdiđ siämmááahasij párnáiguin já nuorâiguin. ”Keevâtlávt säminuorâi taaiđâtábáhtus tuárju sämmilii kulttuuršoddâdem”, Sämitige saavâjođetteijee Pirita Näkkäläjärvi paahud.
Kiđđuv 2028 tábáhtus tuálloo Vuáčust. Ive 2029 kiiđâ tot puátá Anarân.
Käldee:
– Säminuorâi taaiđâtábáhtus uárnejuvvoo Heta škoovlâst kiđđuv 2027 (samediggi.fi)
Kove: Sämitigge / Johanna Alatorvinen