Taažâ kunâgâs Harald V lii jáámmám, muštâl Taažâ kunâgâsviste. Sun eelij 89-ihásâžžân (1937–2026). Sun jaamij Oslo Rikshospitalet-pyecceiviäsust porgemáánu 28. peeivi tijme 6.35 páihálii ääigi.
Kunâgâs valdui pyecceiviäsun porgemáánu 17. peeivi hemolyytlii anemian lohtâsuvvee komplikaatioi keežild. Taan puácuvuođâst ruopsisseelah tuššeh eromâš jotelávt. Kortisontipšo tovâttij sunjin kolgos čokkâšume roopân, mondiet sun tarbâšij tipšo pyecceiviäsust. Pyecceiviäsupaje ääigi šoddii uđđâ vädisvuođah, ko sun finnij bakteerinfektio vorrâjotemân.
Vala algâohhoost hovi tieđettij, et kunâgâs Harald tile lâi stääđis, mut tuorâstuv poođij uđđâ tiätu, et tile lâi eromâš huolâstuttee.
Kunâgâs tile huánánem keežild Taažâ kunâgâspeerâ já eennâm haldâttâh karttii nubástittiđ suunâttâllum ohjelmis loppâohhoost. Taažâ njunošminister Jonas Gahr Støre macâttij Saksa-määđhis kunâgâs huánánâm tiervâsvuotâtile keežild tuorâstuv. Meid eennâm pispeh maccii tolebiššáá olgoeennâmmäđhistis Taažân.
Harald V lâi Taažâ kunâgâs ive 1991 rääjist, já sun lâi Euroop puárásumos haldâšeijee monark. Suu tiervâsvuotâ tovâttij majemui aigij eromâš ennuv huolâ, já sun valdui maŋgii pyecceiviäsun.
Harald V jäämmim maŋa suu algeest ruvnâprinssâ Haakonist šoodâi tállân uđđâ kunâgâs.
Kove: Kunâgâslanne: Marja-Liisa Olthuis; Kunâgâs Harald V: India njunošminister toimâttâh (GODL-India, Wikimedia Commons); Kuvij ovtâstittem: Valtteri Valkeapolku