Suomâ vuoitij Sveeici 1–0 jotkâääigi jieŋâskiäru MM‑finalist. Fiinaalspellâ aalgij pasepeeivi tijme 21.20 Suomâ ääigi, já vuáittumoolâ šoodâi eidu koskâiijâ maŋa. MM‑kolle lii Suomân viiđâd.
Suomâ sáŋgárin šoodâi 20‑ihásâš Konsta Helenius talle ko vuosmuu jotkâääigist lâi 9.18 spelâhánnáá. Helenius tuálvui skiäru Suomâ volliittemkuávlun, punjâttâlâi Sveeici piälušteijee já paajij skiäru moolân nube sveiccilii spellee juolgij kooskâst. Anton Lundell já Mikko Lehtonen finnijn faallâmčuággá.
Fiinaalspellâ lâi eromâš täässiv, já kuábáš-uv juávkku piäluštij jieijâs kuávlu tárkká. Tuođâi varâliih moolâpääččimsajeh šoddii tuše muáddi. Sveeici moolâst Leonardo Genoni tuástui 27 paccâmid, já Suomâ moolâst vist Justus Annunen tuástui 22 paccâmid.
Suomâ lii tääl vuáittám jieŋâskiäru MM‑kole vittii. Ovdebááh vuáituh lijjii iivij 1995, 2011, 2019 já 2022.
MM-kištoh spiällojii Sveeici Zürichist já Fribourgist. Fiinaaltáppu vildáskâm päikkikeččei oovdâst lâi Sveeicin mielâttes stuorrâ pettâšume. Taat lii jo kuálmád ihe maŋaluvâi ko Sveicci lii táppám finalist, ige tot lah luhostum pääččiđ oovtâgin moolâ täin speelâin. Ovdil fiinaal Sveicci lâi vuáittám puoh spelâidis, meid Suomâ 4–2 algâsäärji speelâst.
Kollejuhleh onne Helsigist tijme 18
Suomâ vuáitu mield tuhátteh Leijoon-fanih čokkânii torijd pirrâ Suomâ pasepeeivi já vuossaargâ koskâsii iijâ. Juhleh juátkojeh onne ko Suomâ juávkku máccá Suomân.
Juávkku kuállee vistig Suomâ president Alexander Stubb kulen Mäntyniemist tijme 16.30.
Leijonij aalmugjuhle uárnejuvvoo tijme 18 Helsig Olympiastadion oovdâst Mäntymäki kiedist já Stadioninaukiost, Yle čáálá. Ulmuuh uážžuh puáttiđ pääihi oolâ tijme 16.30 rääjist, já jieŋâskiärrujuávkku poođiš tijme 19.30. Tilálâšvuotâ nohá tijme 21.
Taažâ vuoitij historjás vuosmuu MM‑miitaal jieŋâskiärust
Aalmugijkoskâsâš jieŋâskiärru finnij uđđâ miitaaleennâm ko Taažâ vaaldij vuosmuu MM‑mitalis vyeittimáin pronssispeelâst Kanada, mii lâi táppám Suomân semifinalist.
Taažâ valastâllâmfanih čuovvuu pronssispeelâ jiäráskittee tobdoiguin. Kyevti uási maŋa eennâm lâi niske alne 2–0, mutâ Kanada loppâčovgim luhostui já kanadaliih tässejii moolâid 2–2:n käävci sekuntid ovdil Taažâ vuáitu. Kuulmâ já pele miinut jotkâäigispellâm maŋa Noah Steen peestij taažâid toskeest ko sun paajij skiäru moolân.
Kove: Valtteri Valkeapolku