Luánduvärikuávdáš Luke lii adelâm Suomâ myerjitiäđáttâsâs kesimáánu loopâst. Tot vuárdá, et Suomâst ij šoodâ hirmâd šiev lyemeihe taan tove.
Luke tiäđui mield lyemekukáh láá lamaš váhá eenâb ko táválávt mut iä kuittâg siämmáá ennuv ko tijmá. Liijkágin kovjim ij lah luhostum nuuvt pyereest šooŋâi keežild. Kukkim ääigi kiđđâsyelnih iä kuittâg lah hettim.
”Luámánij kavjejeijeeh iä määti nuuvtkin pyereest kirdeđ, adai šiev kovjim váátá piegâttes peeivijd, lieggâ šooŋâid já piäiváduvâid. Tääl šooŋah iä lah lamaš nuuvtkin hiäivuliih kovjiimân, nuuvt et ij lah vyerdimist pyeremus lyemeihe. Mäddiláá šoŋŋâ lii kale lamaš pyereeb, mut tobbeen luámánij šoddâmsajeh iä lah siämmáá ennuv”, muštâl eromâštotkee Rainer Peltola tiäđáttâsâst.
Yle uđđâs mield Suomâ virgálii lyemekieldâst Ranuast kávnojeh esken ovtâskâs ladâgeh. Ranua lyemeäigi lii älgimin suullân oho keččin.
Tave-Taažâst já Tave-Ruotâst luámáneh láá laddâm eromâš tooláá taan ive, muštâleh Taažâ almosradiofinnodâh NRK já Ruotâ almosradiofinnodâh SVT. Táválávt Tave-Taažâ já Tave-Ruotâ pyeremus lyemeäigi lii esken porgemáánust. Tooláá suddâm muotâ, lieggâ algâkeesi já pyeri kovjim láá toledâm lyemeääigi, já ulmuuh pyehtih tääl jo uussâđ luámánijd. NRK sahhiittâllâm ulmui mield sij iä lah kuássin 50 ive ääigi feerim tom, et luámáneh läddih näävt tooláá.
Aanaar kuávlust luámáneh táválávt läddih syeinimáánu pelimudo maŋa.
Anja Kaarret muštâl Anarâš aavisân, et sun lii iällám väzzimin kyevti jiegist. Sun muštâl, et luámáneh kávnojeh hirmâd hyeneeht. Sun smietâd: ”Lii ain váhá olâttâs, mon ennuv luámáneh puátih. Ij lah lamaš koolmâs, lii kal pieggâm muáddi peeivi. Toh luámáneh, moh tääl ruápsájeh, láá puáttee ohhoost laddâm. Mut čoroheh iä lah ennuv.”
Anja Kaarret iätá, et kalga eelliđ suolluin luommiimin oholoopâi ääigi: ”Suolluin luámáneh läddih váhá maŋeláá ko enâmist. Tobbeen läävejeh leđe luámáneh aainâs-uv mottoom verd, mut tohon ij viišâ vyelgiđ keččâđ.”
Anja iätá, et suu uápisolmooš lii iällám suolluin keččâmin, mut tobbeen-uv láá tääl uccáá luámáneh.
”Mun uástám talle eenâb eennâmmuorjijd”, Anja smietâd.
Kove: Jasmina Schreck