Miljovneh ulmuuh Indiast juhloh roovvâdmáánu 20. já 21. peeivi rääjist diwali, mii lii ohtâ hindui puoh tehálumosijn juuhlijn. Viđâpiäivásii juhle ääigi ulmuuh cokkiitteh laampuid já hiärvástâllâmrakettijd já poreh ärbivuáválijd heerskuid já eres purrâmušâid. Juuhlij várás sij láá uástám heervâid, skeeŋkâid já uđđâ pihtâsijd. Maaŋgah rähtih meid ivnáás rangoli-taiđuu pyere luho já positiivlâšvuođâ várás.
Veikâ diwali lii-uv algâalgâlávt oskoldâhlâš juhle, te tom liijká viettih puohlágáneh ulmuuh. Juhleäigi meriduvvoo hindui kalender mield. Táválávt tot juhloo roovvâdmáánu já skammâmáánu kooskâst.
Pasepeeivi ovdil juuhlij Tave-Indiast Ayodhya siijdâst cokkiittuvvojii 2,6 miljovn lamppud. Tot lii uđđâ Guinness maailmulâttâs. Ovdebáš meeri lâi 2,51 miljovn lamppud moonnâm ive.
Raketteh nyeskideh ááimu
Čuovâ juhleest lii meid nubbe peeli: maaŋgah tuhátteh hiärvástâllâmraketteh hiäjusmiteh ááimu kvaliteet, mii lii jo mudoi-uv hyeni eromâšávt tälviv Tave-Indiast. Ton keežild India haldâttâs lii kiäldám rakettij cokkiittem uáivikaavpug Delhist ive 2020 rääjist. Kiälduh láá puáttám meid eres kuávloid majemui iivij.
Taan ive kiäldu lii kuittâg komettum Delhist ”ruánáá” adai pirrâs tááhust puorij rakettij uásild. Nággusij mield ruánáá raketteh luovâsmiteh 20–30 prosentid ucceeb nuáskádâsâid ááimun. Árvuštâllei mield tohkin iä liijká lah pyereh pirrâsân. Ton peeivi ko kiäldu komettui, Delhi ááimukvaliteet lâi 25–30 kerdid hyeneeb ko mii lii Maailm tiervâsvuotâorganisaatio WHO avžuuttâs torvolii rääjist.
Käldee:
– India sparkles as millions celebrate Diwali festival (www.bbc.com)
Kove: Soumendra Kumar Sahoo (Wikimedia Commons)
Iä-uvks juhleh lah roovvâdmáánu 20. já 21. peeivi rääjist? Artikkâlist lohá, ete skammâmáánust.
Artikkâlân lii tuođâi peessâm puástu mánuppaje. Mun lam tivvoom tom. Takkâ ko almottih!