Etna, Sisilia pegâlmâs tullâvääri, lii lamaš liävuttem jo porgemáánu aalgâ rääjist. Máánu pelimuddoost ton maadâvieltist kulgâškuođij laavavirde masa 3 000 meetter aloduvâst. Moonnâm tuorâstuv laava lâi kulgâm jo 2 300 meetter räi.
Sisilia pormiäštár Bonanno muštâl, et motomeh Etna keččeeh iä vääldi huámášumán tullâvääri riiskâid. Moonnâm oho pottii uáinimnáál videoh, main turisteh čuážžuh selgi laava kulij já väldih jieččieid. Pormiäštár ij innig haalijd taam. Vástuppeeivi 22.8. rääjist lii lamaš kieldum puáttiđ meendu alda laava. Torvokoskâ lii 50 meetterid.
Pormiäštár tiädut, et Etna kuuvl moonnâm ij lah kieldum. Uárnejum moheh tohon juátkojeh ain, mut págulâš 50 meetter torvokoskâ kuáská puohháid. Tullâvääri pajemuu uásán uážžu pajaniđ tuše oovtâst uápisteijein, já návt tile lii ain lamaš-uv. Puoh lasseen sun muštoot rievtislágánij pihtâsij já eres torvotooimâi tehálâšvuođâst. ”Laava uážžu kale ihástâllâđ mut ij uhmediđ”, sun iätá median.
Etna lii eromâš aktiivlâš tullâvääri, mii rusoškuát masaba jyehi ive. Suovâpoolvah já kunnâ uáinojeh uáli távjá, mut laavavirdeh iä lah siämmáá táváliih. Laavavirde liihâd hirmâd hitásávt. Meid russoom ääigi lii máhđulâš eelliđ tullâvääri kulen, mut motomin motomeh sajeh piäijojeh kiddâ. Tääl mihheen kuávluid ij lah kiddejum, peic tullâvääri kuuvl puáttee ferttee väldiđ huámášumán torvokooskâ.
Etna kulen majemustáá kiinii ulmuid jaamij ive 1987.
Käldee:
– ’Lavatoeristen’ op de Etna moeten afstand houden (nos.nl)
Kove: Benjamin Smith (Wikimedia Commons)