Meccihaldâttâs ij vyebdi innig rapupivdoluuvijd staatâ čäcikuávloid, kost tiättojeh juhârapuh. Suijân lii tot, ete juhârapunäälih láá kiäppánâm korrâsávt 2000-lovvoost. Juhârapu lii Suomâ algâalgâlâš šlaajâ, mon uhken lii vieresšlaajâ tiälkkurapu, mii njuámut rapuroto. Tiälkkurapu jieš piergee rapurottoin, mutâ rotto tuššâd juhârapuid. Rapupivdo lii ain loválâš staatâ čäcikuávluin, kost tiättojeh tiälkkurapuh.
Juhârapui rávhuiduttem lii fáárust Meccihaldâttâs kuálástem ovdedemohjelmist 2024–2034. Miärádâs oovded aalmuglii rapustrategia uulmijd tego juhârapu eellimpirrâsij já naalij suojâlem.
Juhârapupivdo lii loválâš motomijn čäcikuávluin, maid Meccihaldâttâs laigut. Taah kuávluh kuleh stuárráábáid čäcikuávloid, kost rapuid pivdeh uásálâškodeh, moh meid turvâsteh juhârapunaalij eellimvyeimi. Taan lasseen rapupivdo lii loválâš várugâsvuotâvuáđujurduu mield tagarijn čäcikuávluin, main kávpálâš kuálástem lii merhâšittee. Várugâsvuotâvuáđujuurdâ meerhâš tom, ete tiervâsvuođâ já pirrâs suojâlem tiet pyehtih tohhuđ miärádâsah, veikâ hááituin ij lah tievâslâš tieđâlâš čáittu.
Rapupivdoloveh láá vyebdimnáál syeinimáánu vuosmuu peeivi tijme 9 rääjist. Rapupivdo álgá 21.7. tijme 12 já nohá roovvâdmáánu loopâst. Rapupivdee taarbâš love čäcikuávlu omâsteijest. Jis lii 18–69-ihásâš, te kalga mäksiđ kyelivaljetipšommáávsu.
Käldee:
– Mediatiedote: Jokirapu rauhoitetaan valtion vesialueilla (www.eraluvat.fi)
Kove: Dragon187 (Wikimedia Commons)