Syemmilâš Silja Kosonen lii vuáittám movgáršlivgim Taažâ Bergenist, kost uárnejuvvojii aalmugijkoskâsii almosvalastâllâmlito silbâtääsi kištoh kesimáánu 3. peeivi. Kosonen lii tääl vuáittám puoh vittâ kišto, moid sun lii uásálistám taan ive. Njuhčâmáánust sun šlivgij meid uđđâ Suomâ ulâttâs: 77,07 meetterid.
Bergen kalšâdis kištošooŋâst vuáittušlivgim lâi 75,52 meetterid, maid Kosonen šlivgij tállán vuosmuin keččâlmáin.
– Váhá olâttij, ete tot moonâi nuuvt kuhás. Ton maŋa motomijn šlivgiimijn lijjii vädisvuođah. Nubbe jyelgi uhkedij njulččeđ vuolgust, já mun masa koskâlduttim motomijd šlivgiimijd, Kosonen muštâlij.
Kososiist lijjii fáárust kievrâs kištokyeimih. Nubben poođij kanadalâš Camryn Rogers, kote vuoitij olympiakole moonnâm keesi Pariisist já maailmmiäštárvuođâ ive 2023 Budapestist. Rogers pyeremus šlivgim taan paajeest lii 78,14 meetterid, mutâ Bergenist suu movgár kiirdij tuše 73,93 meetterid. Kuálmádin vist poođij 72,91 meetter šlivgiimáin ovtâstumstaatâlâš Brooke Andersen, kote lii ive 2022 maailmmiästár. Sust lii nomâstis taan paje kuhemus šlivgim: 79,29 meetterid.
– Mun tiettim, ete vyeittim ij lah älkkee, já mun lam kale uáli jo ilolâš, ete vuoittim sunnuu, Kosonen eeđâi.
Kososii eres šlivgiimeh lijjii 74,38 m, 71,94 m, 73,99 m, 73,47 m já 70,80 m. Návt sust lijjii kulmâ kuhemuu šlivgim.
Kososii eres vuáituh taan ive láá Suomâ tälvimiäštárvuotâ Kaustisiist (Suomâ ulâttâs 75,45 m), Euroop tälvimiäštárvuotâ Kypros Nicosiast (Suomâ ulâttâs 77,07 m), Janusz Kusociński muštokištoi vuáittu Puola Chorzówist (73,42 m) já Tour de Hammer -kištoi vuáittu Tammelast (76,56 m).
Eres syemmilij ulâttâsah Bergenist
Mette Baas kaačâi 300 meetter määđhist uđđâ Suomâ ulâttâssân 36,71 sekuntid. Ovdebáš Suomâ ulâttâs lâi 37,09 sekuntid, maid Baas lâi kaččâm sishaalist. Baas poođij Bergenist nubben, tastko taažâ Henriette Jæger kaačâi ääigi 35,46.
– Muu ulmen lâi kaččâđ ulâttâs já peessâđ vuálá 37 sekuntân, Baas muštâlij. Suu váldumätki lii 400 meetterid, maid sun káččá taan ive vuosmuu tove esken kesimáánu loopâst.
Ilona Mononen kaačâi 5 000 meetter määđhist uđđâ persovnlii ulâttâs 15.36,16. Sun poođij kištoost oovcádin. Kišto vuoitij vuáládâheennâmlâš Diane Van Es aigijn 15.18,40.
– Aaibâs pyeri vuáđučođâldâs. Ulâttâs lii liijká ain ulâttâs, já taat mätki ij lah lamaš ain pyeri munjin, Mononen kommentistij.
Sehe Baas já Mononen kaččâv čuávuváá tove Motonet GP -kištoin kesimáánu 11. peeivi Lahtist. Baas káččá 200 meetterid já Mononen vist 3 000 meetter eestâkaččâm.
Käldeeh:
– Kososen jatkoi voittosarjaansa Bergenissä ja peittosi lajin huippunimet: Olen ihan fiiliksissä -Baas SE-vauhdissa (www.yleisurheilu.fi)
– Silja Kosonen heittää elämänsä parasta kilpailukautta ja heitti Tammelassa elämänsä parhaan sarjan (www.yleisurheilu.fi)
– Kosonen täysin ylivoimainen ME-naista vastaan Puolassa (www.yleisurheilu.fi)
– Hirmuvireinen Silja Kosonen näytti kaapin paikan moukarissa – olympiavoittaja ja maailmanmestari jäivät taakse (yle.fi)
Kove: Daieuxetdailleurs (cropped, Wikimedia Commons)