Euroop union statistiikvirgeomâháá Eurostat munetiäđui mield kulâtteijeehoodij pajanem eurokuávlust hiđásmij vyesimáánust 1,9 prosentân. Cuáŋuimáánust loho lâi 2,2 prooseent. Ovdebáá keerdi inflaatio lâi lamaš vuálá kyehti prooseent ive 2024 čohčâmáánust.
Enâmustáá tivruu tagareh tiiŋgah, moos kuleh purrâmâš, alkoholjuhâmâšah já tubbáák. Taan juávhu hadeh pajanii vyesimáánust koskâmiärálávt 3,3 prosentáin, ko tot verdiduvvoo moonnâm ihán. Meiddei palvâlusâi hadeh pajanii koskâmiärálávt 3,2 prosentáin. Energia vist lii 3,6 prooseent häälbib ko tijmá.
Suomâst kulâtteijeehadeh pajanii vyesimáánust 2,1 prosentáin. Enâmustáá tivroi tiervâsvuotâ, moos kuleh ovdâmerkkân talkkâseh já tiervâsvuotâpalvâlusah. Taan juávhu hadeh pajanii koskâmiärálávt masa uvccijn prosentáin. Jotolâh vist háálbui ucánjáhháá. Toos kuleh ovdâmerkkân fiävruh, puáldámušah já juávkkujotolâh.
Inflaatio lâi ucemus Kyprosist (0,4 %), Ranskaast (0,6 %) já Irlandist (1,4 %). Eestienâmist, Kroatiast já Sloveniast inflaatio lâi paijeel nelji prooseent.
Käldeeh:
– Euroalueen inflaatio hidastui alle kahteen prosenttiin (www.hs.fi)
– Euroalueen inflaatio hidastui selvästi (yle.fi)
– Kuluttajahinnat nousivat toukokuussa 2,1 prosenttia (yle.fi)
Kove: Alexandra_Koch (Pixabay)