Nicușor Dan, kote vuoitij Romania presidentvaaljâid vyesimáánu 18. peeivi, šoodâi virgálávt Romania presidentin vyesimáánu 26. peeivi. Viirgánlavkkimtilálâšvuođâstis Dan lopedij, ete sun lii ”president, kote kuldâl ohtsâškode jienâ já kote lii ton ohtsâškode kyeimi”. Dan presidentpaje hástun láá aainâs-uv stuorrâ budjetvuálápáácu, ohtsâškode juáhásem já Ukraina suáti.
Vaaljâi maŋa Dan vyesti-iävtukkâs George Simion lâi vááttám, ete Romania vuáđulahâtuámustovli kolgâččij hilgođ vaaljâi puáttus, tastko suu mielâst olgoenâmeh lijjii siähánâm valjáid. Vuáđulahâtuámustovli kuittâg almottij vyesimáánu 22. peeivi, ete tot lâi oovtâmielâlávt hilgom Simion áánnum. Vaaljâvirgeomâhái já jiešmerideijee tárkkojeijei mield vaaljah lijjii pyereest uárnejum.
President Dan lii teivâm jo eereeb iärásij Suomâ uáiviminister Petteri Orpoin kesimáánu 2. peeivi Liettua uáivikaavpugist Vilnast. Tobbeen uárnejui Bucharest 9 já Tave-enâmeh -čuákkim, mast Nato-enâmij jođetteijeeh sarnuu Ukraina tuárjumist. Dan lii lopedâm juátkiđ Ukraina tuárjum. George Simion vist ličij lopâttâm torjuu.
Käldeeh:
– Romania’s new president is sworn in as a political crisis eases, but challenges loom (abcnews.go.com)
– Romanian top court rejects challenge to annul presidential election (www.reuters.com)
– Pääministeri Orpo Vilnius Summit -huippukokouksessa: Eurooppa kantaa vastuunsa puolustuksen ja turvallisuuden vahvistamiseksi (valtioneuvosto.fi)
Kove: Januszk57 (Wikimedia Commons)