Ameriklâš komovuotâornijdume NASA sirdá almaidittum Artemis II -kirdem Mánudáá pirrâ. Rakkeet pääččim lâi vuávájum ive 2025 čohčâmáánun, mut NASA hovdâ Bill Nelson muštâl, et kirdem ornášuvá esken cuáŋuimáánust 2026. Taat tiätá meid Mánudâžân siäivum maŋedem.
Mánudáá pirrâ kirdem lii sirdum tondiet ko Artemis I -testâkirdem ääigi ive 2022 kapsel liegâsvuotâkolbáin láá lamaš vädisvuođah, Nelson čielgee. Liegâsvuotâkolbâ lâi čuuvtij puállám taan ij-almaidittum kirdemist.
Uđđâ vuávám mield esken ive 2027 NASA-astronauteh siäivuh Mánudáá asan.
Ive 2026 Artemis II -missiost láá fáárust nelji ulmuu: komendeijee Reid Wiseman, kirdee Victor Glover, missiospesialist Christina Koch já missiospesialist Jeremy Hansen.
Jis Artemis II mana pyereest, te NASA áigumuš lii finniđ ive 2027 vuod ulmuid Mánudáá asan. Taat ličij talle vuosmuš luhostum siäivum Mánudâžân ive 1972 maŋa, kuás astronautkyevtis Gene Cernan já geolog Harrison Schmitt siäivoin Mánudáá asan Apollo 17 kirdemist. Kirdee Ronald Ewans paasij stivriđ kirdemmooduul.
NASA lii fáárust mottoommuđusii komovuotâkištottâlmist, tastko kiinalâš komovuotâornijdume áigu siäivuđ Mánudáá asan ive 2030. Nelson tiädut, et NASA haahâ jotá ain ovdiibeln já siäivu tooleeb ko Kiina.
Käldeeh:
– Ruimtevaartorganisatie NASA stelt bemande vlucht rond de maan uit (nos.nl)
– Our Artemis Crew (www.nasa.gov)
Kove: Van Fulpen (Pixabay)