Oulu ollâopâttuv rehtor čuávuváá viiđâ ive toimâpajan lii väljejum Arto Maaninen. Miärádâs valjiimist toovâi Oulu ollâopâttuv haldâttâh tuorâstuv 26.9.2024. Rehtorin väljejum Arto Maaninen tuáimá tääl Oulu ollâopâttuv ohtsâšpargo-ohtâvuođâi värirehtorin. Sun aalgât uđđâ toimâstis ive 2025 aalgâst. Haldâttâh jienâstij valjiimist, já Maaninen väljejui vuosmuin jienâstmáin. Sun finnij paijeel pele adelum jienâin.
Haldâttuv saavâjođetteijee Mikko Ayub muštâl, et Arto Maanisiist láá pyereh čááituh hovdân já värirehtorin toimâmist, já suu hárjánem uápis toimâpirrâsist addel šiev aalgâ rehtor tooimâst luhostuumân. Maaninen lii ovdebij roolijdiskijn huksim ohtsâšpargo pirâstittee ohtsâškoddeest, já sun lii meid huksim aalmugijkoskâsijd viärmáduvâid.
Arto Maaninen lii toimâm Oulu ollâopâttuv ohtsâšpargo-ohtâvuođâi värirehtorin juovlâmáánu 2017 rääjist. Ovdil taam sun tooimâi Teknologia tutkâmkuávdáá VTT tutkâmstivrimpargoin já tutkâmprofessorin. Maaninen lii ive 2004 rääjist lamaš Oulu ollâopâttuv epiorgaanlii kemia dooseent.
”Mun lam tuođâi ilolâš luáttámušâst já lam moovtâ algâttiđ rehtor pargoost. Mun puáđám porgâđ puoh maid puávtám muu čuovviittâm ollâopâttuv puátteevuođâ miänástume oovdân oovtâst ollâopâttuv pargovievváin”, Arto Maaninen muštâl.
Oulu ollâopâttuv haldâttâh leehâi rehtor tooimâ kesimáánu aalgâst. Meriááigán 26.7.2024 räi tooimâ lijjii uuccâm 20 occed.
Rehtor huávdee ollâopâttuv tooimâ já västid ollâopâttuv pargoi puátusijn já ekonomâlii tipšomist. Arto Maanisiist šadda ive 1958 vuáđudum Oulu ollâopâttuv oovcád rehtor.
Tääl tooimâst leijee rehtor mekaanisii prooseestekniik professor Jouko Niinimäki lii toimâm Oulu ollâopâttuv rehtorin kyehti toimâpaje ive 2015 rääjist.
Käldee:
– Oulun yliopiston uudeksi rehtoriksi on valittu Arto Maaninen (www.oulu.fi)
Kove: Mikko Törmänen