Sosiaalsyergi mättimkuávdái väldikodáliih čuoppâmeh hiäjusmiteh Poske sämiohtâduv sämikielâlij já kulttuurmiäldásij sosiaal- já tiervâsvuotâpalvâlusâi ovdedem. Poske västid sämmilij sosiaal- já tiervâsvuotâpalvâlusâi väldikodálii oovdedmist sehe toid lohtâseijee tutkâm-, škovlim- já árvuštâllâmtooimâin, mut resursij vänivuotâ lii jo kuhháá toohâm ton pargo vaigâdubbon.
Staatâvarijministeriö ive 2025 budjetiävtuttâs mield Poske sämiohtâduv resurseh čuáppojeh vala ovdiist. Vuávájum čuoppâmij mield Poske finniiččij staatâst tuše 18 000 euro torjuu ihán 2025. Toin ij innig pastaččii pálkkááttiđ pisováá pargee, já tondiet Poske sämiohtâduv toimâ já toimâhináh keevâtlávt nuvâččii.
Sämitige mield vuávájum čuoppâmij keežild sämikielâlâš aalmug lii karttâmin eresárvusii sajattâhân suomâkielâlii väldiaalmug háárán. Ton lasseen čuoppâmijn láá eromâš merhâšittee já vijđáht ollee vaikuttâsah sämmilij jiešmeridemvuoigâdvuotân já vuáđulavâlij kielâlij já kulttuurlij vuoigâdvuođâi olášumán sosiaal- já tiervâsvuotâpalvâlusâin.
Sämitigge iävtut sirdâšume fastâ vittádum resursáid. Taat tovâččij máhđulâžžân oovtâ olesáigásii pargee pálkkááttem já sämiaalmugân uáivildum sosiaal- já tiervâsvuotâpalvâlusâi ovdedem.
Käldee:
– Sämitige stivrâ meridij 193 000 euro vuáháduttemtooimâin (samediggi.fi)
Kove: Ville Fofonoff / Sämitigge