Majemui ohoi koronavirusnjuámumij meeri lii lasanâm mottoom verd Suomâst. Tuolvâčäcitutkâmušâin láá vuottum váhá eenâb koronavirusmereh ko ovdil, já meid laboratorioiskosijn láá kavnum eenâb njuámumeh.
Tiervâsvuođâ já pyereestvaijeem lágádâs THL njuámmootavdâtuáhtár Aino Nyqvist muštâl, et Suomâ koronatile lii kuittâg almolávt viehâ rávhálâš. Koronavirusnjuámumeh vuáttojeh mottoom verd, mut stuorrâ uási njuámumijn iä lah THL tiäđust tondiet ko puoh njuámumeh iä innig tutkuu iskos peht.
Koronanjuámumeh lasanii loppâkeesi meid tijmá. Taan ive toh lasanii tolebiššáá, mut Nyqvist mielâst lii vala meendu tooláá ettâđ maiden tast, maht tile ovdán čoovčâ räi. Táválávt enâmustáá njuámumeh láá tälviv.
Motomijn Euroop enâmijn já Tave-Amerikist koronavirusnjuámumeh láá lasanâm jo algâkeesi.
Nyqvist mield táálááh koronatábáhtusah sulâstiteh iänáážin leencu, já viärráás tavdâ lii härvinub. Viärráás taavdâst killájeh táválávt elilâm ulmuuh sehe tagareh ulmuuh, main lii kuhesáigásâš tavdâ teikkâ hiäjulum immuunpiäluštâs.
Nyqvist rävvee, et jis koronavirus lii njuámmum, te lii avžuuttettee pissoođ pääihist nuuvt kuhháá ko láá tavdâmeerhah. Talle ko tavdâmeerhah iä lah innig já vajo lii pyeri, te puáhtá maccâđ táválii elimân.
THL tieđettij vyesimáánust, ete sij avžuutteh elilâm ulmuid sehe tiätu riskâjuávhoid piähtupuáhuttâs puáttee čoovčâ.
Käldeeh:
– Koronavirustartunnat aavistuksen nousussa, mutta tilanne yhä rauhallinen (yle.fi)
– Korona jyllää Suomessa (www.iltalehti.fi)
Kove: Gerd Altmann (Pixabay)