Ovtâstum staatâi republikaanpiäláduv presidentiävtukkâs Donald Trump ij ááigu uásálistiđ vaaljâtigáštâlmân tááláá väripresident já máhđulii presidentiävtukkâs Kamala Harris vuástá ovdilgo demokraatpiäládâh meerrid virgálii presidentiävtukkâsâs.
Ovdil kiäsádittem ive 2024 presidentvaaljâin tááláš president Joe Biden lâi sooppâm Donald Trumpáin vaaljâtigáštâllâm čohčâmáánu 10. piäiván. Čohčâmáánu 10. peeivi tigáštâllâm uárnejeijen ličij ABC News -uđâskanava. Harris lii meiddei almottâm, ete sun uásálist tigáštâlmân, jis sust šadda presidentiävtukkâs. Trump kuittâg almottij, ete sun ij haalijdgin uásálistiđ čohčâmáánu 10. peeivi tigáštâlmân, pic sun halijdičij orniđ tom čohčâmáánu 17. peeivi. Trump meiddei tuáivui, ete Fox News išedâšâččij tigáštâllâm.
ABC News lii almolávt onnum ”čižetpiälán mieigee” uđâstoimâttâhhân, ko vist Fox News lii távjá onnum eenâb konservatiivlâžžân já republikaanmielâsâžžân.
Demokraatpiäláduvvâst lii äigi almostittiđ jieijâs president- já väripresidentiävtukkâsâid porgemáánu 7. peeivi räi. Demokraatpiäláduv iävtukkâsvaaljah älgih porgemáánu 1. peeivi. Iävtukkâsvaaljâin meriduvvoo tot, ete kii oovdâst demokraatpiäláduv presidentkištoost republikaanij Donald Trump vuástá. Maaŋgâi uđâstoimâttuvâi mield Kamala Harris lii jo fáárust demokraatpiäláduv iävtukkâsvaaljâin.
Ovtâstum staatâi presidentvaaljah ovdáneh korrâ liävttoin. Republikaanij presidentiävtukkâs Donald Trump juátká presidentkampanjas aktiivlávt demokraatij máhđulii iävtukkâs Kamala Harris vuástá. Harris lii meiddei algâttâm presidentiävtukkâskampanjas, veikkâ demokraatpiäládâh ij lahkin vala virgálávt valjim suu presidentiävtukkâssân.
Tast huolâthánnáá Kamala Harris lii puáhtám ennuv kyeditteijeid demokraatpiäládâhân. The New York Times -uđâsloostâ gallup mield 48 % máhđulijn jienâsteijein jienâstiččii Trump, já 47 % adeliččii jienâs Harrisân. Uđâstoimâttâh Reuters gallup mield Harris kannattem lii joba 2 % eenâb ko Trumpist. Taat lii ennuv täsivub tile ko talle ko Biden lâi vala demokraatij presidentiävtukkâs. Talle Trump kannattem lâi joba 6 % stuárráb ko Bidenist.
Helsingin Sanomat -aavis mield gallupijn selvân meiddei, ete Harris lii pyereeb muulsâiähtu eromâšávt nuorâ jienâsteijei mielâst. Ive 2020 presidentvaaljâi puátusij vuáđuld Trump jienâsteijeeh láá váhá puárásuboh já konservatiivluboh.
Käldeeh:
– Trump ei suostu vaaliväittelyyn Harrisin kanssa, ennen kuin demokraateilla on ehdokas (yle.fi)
– Trump ei suostu vaaliväittelyyn Harrisin kanssa – vaatimuksena, että demokraatit valitsevat virallisen ehdokkaansa (www.mtvuutiset.fi)
– Obamat tukevat Kamala Harrisia demokraattien presidenttiehdokkaaksi (www.hs.fi)
– How Groups Voted in 2020 (ropercenter.cornell.edu)
Kove: Gage Skidmore (Wikimedia Commons)