Taankiärdásiih kesiolympialiih tuállojeh 26.7.–11.8. Pariisist. Pariisin taah kesiolympialiih láá jo kuálmádeh. Ovdil kaavpugist láá tollum kesiolympialiih ivij 1900 já 1924. Ton lasseen Pariisist láá uárnejum tälviolympialiih kulmii ivij 1924, 1968 já 1992.
Olympialij lekkâmseremonia tuálloo syeinimáánu 26. peeivi, já kištoh noheh lopâttemseremonian porgemáánu 11. peeivi. Seremoniah tuállojeh Stade de France -stadionist, moos šiettih pajeláhháá 81 000 olmožid.
Mitaleh juáhhojeh ohtsis 329 kištottâllâmhäämist. Fáárust láá 44 šlaaijâd. Pariisin vuárdojeh ohtsis suullân 10 500 valastâlled pajeláhháá 200 enâmist. Ton lasseen fáárust lii val Aalmugijkoskâsii olympiakomitea (AOK) patâreijei olympiajuávkkudâh. Suomâst Pariisin uásálisteh ohtsis 57 valastâlled.
Olympialij ohjelm lii mottoom muudon uđâsmittum. Uđđâ šlaaijân fáárun lii valdum breikkam, mii lâi jo fáárust nuorâi olympialijn Buenos Airesist ive 2018. Taat šlaajâ lâi tobbeen stuorrâ miänástus.
Viehâ uđđâ šlaajah láá meid rulláluávdástem, surffam já kuárŋum, moh lijjii ohjelmist jo Tokio olympialijn. Uđđâ šlaajâi fáárunväldim lii onnum tehelâžžân tondiet, et meid nuorah valduuččii pyerebeht huámášumán árvukištoin.
Käldeeh:
– Olympic Games Paris 2024 (olympics.com)
Kove: PublicDomainPictures (Pixabay)