Namibia alemus riehti lii komettâm laavâ, mii kieldij seksuaallijd koskâvuođâid almai kooskâst.
Laavâ madduuh lijjii kolonialismääigist. Laavâst luvâttâllojii ”sodomia” já ”epiluánduliih seksuaalliih tooimah” rikosin. Ive 1990 Namibia šoodâi jiečânâs staattân, mutâ ton maŋagin laahâ ij muttum. Veikkâ laahâ ij ennuv kevttumgin, te tot tovâttij kuittâg palo seksuaalucceeblovoi olgooštmist. Laahâ ij kuoskâm nisonáid.
Namibialâš olmoošvuoigâdvuotâaktivist Friedel Dausab ášáskutij Namibia staatâ kiäldust. Sun vaađâi puoh ovdebái tuámui komettem.
Namibiast ij aingin lah máhđulâš naaijâđ siämmáá suhâpele leijee ulmuin. Alemuu rievti vyesimáánu 2023 toohâm miärádâs mield näimilitto kuittâg tubdâstuvvoo, jis parâkodde naajâi olgoenâmijn já nube pelikyeimist ij lah Namibia aalmugjeessânvuotâ. Eromâšávt oskolduvliih juávhuh kritisistii taam miärádâs korrâsávt.
Meid eres afriklijn enâmijn tego Botswanast, Gabonist já Angolast láá komettum queer-ulmui rikoslaavah. Seksuaalliih koskâvuođah siämmáá suhâpele leijee ulmui kooskâst láá kuittâg ain-uv kieldum suullân 30 Afrik enâmist. Maadâ-Afrik lii áinoo eennâm Afrikist, kost siämmáá suhâpele leijee parâkodeh uážžuh naaijâđ já adoptistiđ párnáid.
Käldee:
– Namibia kippt Anti-Homosexuellen-Gesetz (www.tagesschau.de)
Kove: jorono (Pixabay)