Kesimáánu 26. peeivi 2024 ruátálâš šoŋŋâdâhaktivist Greta Thunberg uásálistij Elokapina-mielâčáittusân Mannerheimintiest Helsigist. Tábáhtus aalgij ovdâskoddetáálu oovdâst, kost Thunberg toolâi sahâvuáru.
Thunberg sahâvuáru maŋa mielâčäitteeh algâttii ráiđuväzzim, mii vuolgij suullân tijme 16:15. Ráiđuväzzim ličij kolgâm jotteeđ Kaivokatu peht Kaisaniemi jotolâhriggee luus, mutâ tot paasij čäittiđ mielâ Mannerheimintie ratkuuttâhân.
Pel kuuđâ suulâin ratkuuttuvâst lijjii jo ennuv ulmuuh. Motomeh sist čuojâttii muusik, já motomeh vist čokkájii sajestis. Maaŋgah mielâčäitteeh kuoddii liipuid, mutâ pääihi alne lijjii meiddei stuorrâ banderoleh. Maŋgâsist lijjii fáárust uces laapuh, moid lâi merkkejum ”1,5 ℃”. Toin naalijn mielâčäitteeh halijdii muštottiđ tast, ete šoŋŋâdâh lii tääl 1,5 ℃ lieggâsub ko ovdâráhtulâšvuođâ ääigi. Liipui já banderolij lasseen tábáhtusâst huikkui ovdâmerkkân: ”Ájáttâllâm hadde, nuhâmettum vuástálistem!”
Suullân tijme 18.40 poolis meridij lopâttiđ mielâčáittus já táátui ulmuid vyelgiđ meddâl. Mielâčäitteeh iä kuittâg vuálgám kuussân, já tondiet poolis luptij Thunberg já eres-uv mielâčäitteid poolislinjášauton.
Greta Thunbergist šoodâi pegâlmâs ive 2018, ko sun muštâlij šoŋŋâdâhnubástusâst Ruotâ staatâpeivitáálust. Thunberg lâi talle vuáđuškoovlâ oovcád luokkaast. Tábáhtus piejâi joton maailmvijđosii aalmuglihâstuv.
Käldee:
– Kuvat näyttävät, miten päivän tapahtumat etenivät (www.hs.fi)
Kove: Anders Hellberg (Wikimedia Commons)