Euroop jyelgipállulitto uárnee jyehi ive Champions League ađai Miäštárij liiga. Toos uásálisteh Euroop jyehi staatâ jyelgipálluliiga miäštáreh sehe eres-uv korrâ juávhuh, moh ovdebáá ive spellii pyeremuin jyelgipálluliigain (Italia, Saksa, Espanja, Eŋland, Ranska jna).
Taan ive finalist spellii saksalâš Borussia Dortmund já espanjalâš Real Madrid. Real Madrid vuoitij Borussia Dortmund 2–0. Taat lâi vitnubálovváád vuáittu Real Madridân, já juávkku lii-uv vuáittám eenâb Miäštárij liigaid ko mihheen eres juávhuid. Borussia Dortmund lii vuod vuáittám tuše ohtii ive 1997.
Fiinaal spellui lávurduv kesimáánu 1. peeivi 2024 Wembley stadionist Lontoost. Jyelgipállustadionist lijjii 86 000 keččed, já speelâ aalgâst jyelgipállukiedist lijjii mottoom verd vädisvuođah tondiet ko muáddi fani kaččii kiedi oolâ aaibâs algânjurgâs maŋa, mii hettij speelâ algâttem. Taat hettij meid spelleid, tastko vuosmuš kiädán kaččee halijdij väldiđ kuuvijd spelleiguin.
Borussia Dortmund speelâi maaŋgâi mielâst pyerebeht ko Real Madrid fiinaal aalgâst. Real Madrid uáivivälmejeijee Carlo Ancelotti-uv muštâlij: ”Mij monâttijm páálu liijgás távjá já puástu soojijn. Mij tiiptijm Dortmund spellâđ nuuvtko sij halijdii.” Real Madrid kuittâg-uv finnij kyehti moolâ speelâ loopâ peln. Real Madrid spellee Dani Carvajal čievčâstij juávhus vuosmuu moolâ talle ko spellâmäigi lâi kuullâm 74 minuttid. Carvajal lii-uv onnum speelâ pyeremussân spellen. Vuosmuu moolâ maŋa Borussia Dortmund ij pastam reagistiđ, ijge tot finnim oovtâgin moolâ. Nube já majemuu Real Madrid moolâ čievčâstij Vinicius Junior oovce minuttid maŋeláá.
Miäštárij liiga 2024–2025 lii 70. kerdi, ko liiga uárnejuvvoo. Fiinaal uárnejuvvoo vyesimáánu loopâst Allianz Areenast Münchenist Saksaast.
Käldeeh:
– Real Madrid valloitti 15. kerran Mestarien liigan – Dortmundin ote kirposi avausmaaliin (yle.fi)
– Kuinka Real Madrid tekee sen aina? Maailman arvokkaimmalta pelaajalta upea ele Mestarien liigan voittohuumassa (yle.fi)
– Real Madrid voitti jälleen Mestarien liigan (www.hs.fi)
– Mestarien liigan finaalissa skandaalinäky! Tuomas Virkkunen menetti malttinsa – ”Tämähän on jo ihan sairasta!” (www.mtvuutiset.fi)
Kove: jorono (Pixabay)