Aanaar já Avveel pelimuddoost, Äijihjäävri puotâ, neeljišluodâ jotolâh orostittui vástuppeeivi 15.3. ehidispeeivi, ko Suomâ piäluštemvuoimij taŋkker lâi vuáijám miäcán. Sáátust lijjii 11 olmožid. Olmoošvahâgeh iä kuittâg šoddâm. Päärti keežild šoodâi jotolâhnuorbâs. Taŋkkereh lijjii ohtsis vittâ siämmáá rááiđust. Iššeen pottii piäluštemlágádâs já poolis.
Suátivievâ fiävruh já suátiulmuuh láá lamaš ennuv joođoost Säämist Nato-juávhui Nordic Response 24 -hárjuttâs tiet.
Seitamaija Keskitalo lâi eidu puátimin pargoost já lâi jotemin Anarist Avelân, ko pärtti šoodâi já jotolâh orostij.
- Mun poottim ton pärttisajan eidu talle ko pärtti lâi sattum. Oinim, et panssartaŋkki lâi vuáijám miäcán. Aaibâs pirrâ tot lâi juurrâm, ko ton teleh čujottii njuolgist aalman. Kiästen ij lamaš luhhoost eeti, ige kihheen orroom lemin lammâšum. Suátiulmuuh piejii jotelávt váruttemkulmâháid luoddâpellâs, já loppâloopâst mun peessim tast lappâd.
Suáluičielgist šoodâi siämmáá peeivi nubbe-uv pärtti neeljišluodâ alne ko tuuriistbussi vuoijij čergui. Kihheen ij kuittâg lammâšum.
Käldee:
– Inarissa Nelostiellä tapahtui kaksi liikenneonnettomuutta (www.lapinkansa.fi)
Kove: Anna Askala