Tavesämmilâš Pirita Näkkäläjärvi lii väljejum Sämitige uđđâ saavâjođetteijen 2024–2027 toimâpajan. Sun vuoitij jienâstmist nube iävtukkâs Anni Koivisto 13–8. Vuossâmužžân värisaavâjođetteijen väljejui Leo Aikio. Nubbe värisaavâjođetteijee lii Tuomas Aslak Juuso, kote ovdebáá toimâpaje tooimâi saavâjođetteijen. Sii lasseen stiivrân láá väljejum meiddei Karen-Anni Hetta, Tauno Ljetoff, Inka Musta já Asko Länsman.
Näkkäläjärvi valmâštui ive 2005 kävppitiettui maisterin Helsig kävppiollâškoovlâst, mon maŋa sun lii porgâm kuhháá maailmvijđosii finnodâhmaailmist. Iivij 2012–2017 sun tooimâi Yle Säämi hovdân, mut sun paasij oppâluámun jo čohčuv 2016. Siämmáá ive sun valmâštui uđđâsist maisterin London School of Economicsist. Tääl sun lii náguskirjetotkee Sibelius-Akatemiast.
45-ihásâš Näkkäläjärvi lii meid toimâm kuhháá sämipolitikkárin. Sun väljejui vuossâmuu keerdi Sämitiigán ive 2011 vaaljâin, main sun finnij 77 jiennâd. Näkkäläjärvi kuittâg iäránij Sämitiggeest jo čuávuváá ive kesimáánust, tastko sun väljejui Yle Säämi hovdân. Ive 2019 vaaljâin sun finnij 106 jiennâd já väljejui uđđâsist Sämitiigán. Čuávuváin vaaljâin ive 2023 sun finnij tuárvi jienâid, já nuuvt sun juátká sämitiggeairâsin vala nelji ive. Sämitige lasseen sun lii Aanaar váldustiivrâ jeessân.
Kimberli Mäkäräinen
Käldeeh:
– Tässä on uusi Saamelaiskäräjät (yle.fi)
– Pirita Näkkäläjärvi cealkán iežas eret Yles – sirdašuvvá ođđa bargui čakčat (yle.fi)
– Saamelaiskäräjävaalit 2019 (yle.fi)
– Sämitiggevaaljâi puáđus (www.samediggi.fi)
– Pirita Näkkäläjärvi válljejuvvui Sámedikki ođđa ságadoallin: ”Hálidan leat buot sámiid presideanta” (yle.fi)
Kove: Ville Fofonoff / Sämitigge