Ubâ maailm suorgâttâm World Trade Centerân já Pentagonân čuáccám terrorvollitmijn láá kuullâm 22 ihheed. Tain vollitmijn jammii paijeel 3 000 olmožid čohčâmáánu 11. peeivi ive 2001. Masaba 3 000 vollitmijn jáámmám ulmuu nommâd lohhojii jiänusân, já sii mušton suáittojii kiäluh New Yorkist, Washingtonist já Pennsylvaniast.
Väripresident Kamala Harris sehe ovdiih já táálááh New York pormiäštáreh uásálistii muštotilálâšvuotân terrorvollitmij muštomeerhâ kulân New Yorkist oovtâst uhrij omâhâšâigijn já huolhijgijn.
Staatâkolliistâlmijn Vietnamist maccâm Ovtâstum staatâi president Joe Biden uásálistij muštotilálâšvuotân vuossaargâ Ovtâstum staatâi suáldátcaggesaajeest Anchoragest Alaskast.
Osama bin Laden vuávám jiešsormevollitmist kyehti kaappajum kirdemmaašin kirdii New Yorkist World Trade Center jyemehâštornâi njeigâ, mon keežild polvâsárgooh virrii. Kuálmád kaappajum maašin teivâsij Ovtâstum staatâi piäluštâsministeriö rakânâsân Pentagonân Virginiast Washington alda.
Niäljád maašin koočâi enâmân Pennsylvania táálunkuávlust, ko mađhâšeijeeh irâttii orostittiđ kaapparijd. Taat kirdemmaašin lâi kirdemin Washingtonân.
Käldeeh:
– Näin Yhdysvalloissa muisteltiin syyskuun 11. päivän terrori-iskujen uhreja (www.is.fi)
– September 11 attacks: What happened on 9/11? (www.bbc.com)
Kove: David Mark (Pixabay)