Turnam uárnejui taan ive lovváád keerdi, já čiččâd keerdi Nokiast ”The Beast” ‑raađeest. European Open kulá frisbeegolf neelji Major-turnam juávkun. Kulmâ eres Major-turnam láá MM-kištoh, Ovtâstum staatâi ávus miäštárvuotâkištoh já Champions Cup.
Uáli čovgâ ávus turnam vuoitij ovtâstumstaatâlâš Corey Ellis. Taan ive enâmustáá miänástum spellee Calvin Heimburg lâi kišto njunošist kuulmâ vuosmuu kiärdu maŋa. Majemuu kiärdust Heimburg speelâi kuittâg viehâ hyeneeht. Suu vuosmui oovce väävli puáđus lâi táásá par, já tondiet sun koočâi vuossâmuu saajeest. Heimburg hyenes kiärdu tiet spellâ muttui täsivubbon, já kiärdu loppâuásist kuuđâ spellee puáđusiäru lâi tuše muádi leggistem verd. Motomin joba kulmâ spellee lijjii täsipuátusist. Ovdil kutnubálovváád väävli Anthony Barela jođettij kišto puátusáin 32 vuálá par. Ellis lâi nubben ohtâ leggistem maajeeld. Kuulmâ leggistem keččin lijjii Heimburg, Ezra Aderhold, Kyle Klein já moonnâm ive vyeittee Eagle McMahon. Kutnubálovváád vävli lii uáli väädis. Tot lii nuuvt kočodum suáluivävli, mast koori pirrâ leijee spellâmkuávlu hämmee ”suolluu já jis spellee leggist spellâmkuávlu ulguubel, te sun ferttee leggistiđ uđđâsist siämmáá saajeest. Puoh kuttâ spellee piergejii pyereest vuosmuu leggistmist spellâmkuávlun. Barela kuittâg-uv leggistij aldanemleggistmis neljii lappâd spellâmkuávlust já finnij väävlist nelji paijeel par, mon keežild sun koočâi vuáittutaistâlmist meddâl. Ellis vuod luhostui vuosmuu keerdi, finnij birdie já kárgái njunošân ovdil kyevti majemuu väävli. Sun finnij meid čuávuváá väävlist birdie já siäiluttij kyevti leggistem njunoš, mii tárguttij keevâtlávt tom, ete par finnim majemuu väävlist visásmitáččij suu vuáitu. Sun leggistij-uv majemuu väävlist par já vuoitij turnam puátusáin 33 vuálá par. Kyle Klein, kote leggistij birdie kuulmâ majemuu väävlist, poođij nubben puátusáin -32. Ezra Aderhold poođij kuálmádin puátusáin -31. McMahon feilij 17. väävlist já Heimburg 18. väävlist, já suoi poođijn niäljádin puátusáin -30. Barela, kote lâi jođettâm kišto paje loppâuásist, poođij loppâloopâst čiččâdin.
Ellis ij lamaš ovdil turnam merhâšittee vyeitteekandidaat. Taat lâi-uv sunjin vuosmuš vuáittu Major-turnaamist já mudoi-uv vuosmuš vuáittu tehálii turnaamist. Stuorrâ olâttâs suu vuáittu ij kuittâg lamaš, tastko sun lii taan ive peessâm Ovtâstum staatâi Pro Tour -turnaamist kuulmâ pyeremuu juávkun já suu PDGA-rating lii lamaš syeinimáánust 18. pyeremus. Meid Kyle Klein já Ezra Aderhold nubbe já kuálmád saje lijjii pyeremuuh Major-sajattuvah sunnuu karrieerist. Pyeremus syemmilâš já eurooplâš spellee lâi Väinö Mäkelä, kote poođij ohtnubálovádin puátusáin -25. Syemmilijn kyehtlov pyeremuu juávkun sajaduin Mäkelä lasseen Nestori Tuhkanen (17.) já Rasmus Saukkoriipi (19.). Niklas Anttila, kote moonnâm ive poođij niäljádin, lâi taan ive 22:n.
Nisonij turnaamist Heidi Laine poođij nubben já juuvsâi pyeremuu sajattuvâs Major-turnaamist. Laine lâi sahhiittâlmist olâttum čođâldâsâstis: ”Mun jiem tiättám, ete puávtáččim piergiđ návt pyereest. Ulmen lâi peessâđ 16 pyeremuu juávkun já majemuu kiärdun.” Laine lâi ovdil majemuu kiärdu viđâdin, mut pajanij pyere spellâm áánsust nubben. Suu majemuu kiärdu puáđus lâi -1, mii lâi meid ubâ kiärdu puoh pyeremus puáđus. Laine lâi vala ovdil majemuu väävli jyehimin kuálmád saje Catrina Allenáin kyehti leggistem maajeeld Missy Gannon. Laine luhostui leggistiđ väävlist kyehti uáli pyere leggistem já finnij tast eagle. Maajeeb juávhust leggistâm Gannon vuod feilij já finnij bogey. Návt Laine moonâi Gannon lappâd ovttáin leggistmáin já juuvsâi nube saje puátusáin vittâ paijeel par. Allen, kote leggistij birdie majemuu väävlist, juovij kuálmád saje Gannonáin puátusáin +6. Ovdil turnam Suomâ kyevti pyeremuu spellee láin Henna Blomroos já Eveliina Salonen, mut sunnuu turnam ij moonnâm hirmâd pyereest. Blomroos lâi ovdil majemuu kiärdu nubben, mut hyenes puáđus +7 kočâttij suu ovcádin. Suu ubâ turnam puáđus lâi +11. Salonen vuod leggistij +14 já sajadui kyehtnubálovádin. Turnam vuoitij eestieennâmlâš Kristin Tattar puátusáin -11, mii lâi joba 16 leggistmid ucceeb ko Lainest. Tattar lii moonnâm keesi rääjist lamaš aaibâs jieijâs tääsist, ko sun lii vuáittám kulmâ oovdeb neelji Major-turnaamist. Tattar lâi meid vuosmuš eurooplâš, kote lii vuáittám European Open nisonij turnam. Ávus turnam peln áinoo ij-ovtâstumstaatâlâš vyeittee lii lamaš ruátálâš Jesper Lundmark. Syemmilijn pyeremuuh sajattuvah láá lamaš ávus turnaamist Timo Pursio nubeh sajeh iivij 2006 já 2009. Nisonij turnaamist nube saje láin juuvsâm ovdil Laine Henna Blomroos iivij 2017 já 2019 sehe Eveliina Salonen ive 2022.
Käldeeh:
– European Open 2023 presented by Discmania (www.pdga.com)
– Suomalaisyllättäjä kakkonen Nokian frisbeegolfkisassa –”En tiennyt, että pystyn tähän” (yle.fi)
Kove: Kevin Phillips (Pixabay)