Italia tiervâsvuotâministeriö almoot, et lávvárdâhân enâmân lii adelum váruttâskoodi ruopsâd korrâ pakkâs keežild. Italiast láá lamaš šoŋŋâváruttâsah jo maŋgâ peeivi pakkâs keežild. Pasepiäiván ruopsis koodi finnejeh vitnubáloh kaavpugid.
Korrâ pakkâs lii vyerdimist Barist, Bolognast, Cagliarist, Campobassost, Cataniast, Civitavecchiast, Firenzest, Frosinonest, Latinast, Messinast, Perugiast, Pescarast, Rietist, Roomast já Viterbost. Pasepeeivi liiston lasettuvvoo meid Palermo.
Virgeomâhááh várutteh, et paahâs sáttá leđe riskâ meid tiervâs já aktiivlij ulmui tiervâsvuotân, ij tuše riskâjuávhoid, uccâ párnáid já kroonisávt pyecceid. Avžuuttuvvoo, et ulmuuh iä monâččii peeivipaštui 11 já 18 kooskâst já et kolgâččij karveđ soojijd, main láá ennuv ulmuuh.
Anarâš aavis njunoštoimâtteijee Fabrizio Brecciaroli lâi Italiast jieijâs vaanhimij päikkikaavpugist Jesist eidu pakkâsumos ääigi. Suu mielâst puoh unohumos peivi lâi majebaargâ, kuás Jesist lâi 41 cekkid liegâs. Iho-uv lâi suullân 30 cekkid, já tondiet lâi vaigâd uáđđiđ. Peiviv kaavpugist koolgâi velttiđ peeivipaštuu já mušteđ juuhâđ távjá. Ohtâ šiev konstâ lâi moonnâđ merâriidon ain ko máhđulâš já viettiđ ennuv ääigi čääsist.
Eres-uv sojij Euroopist lii paahâs
Kreikkaast turistijd kiäsutteijee Akropolis-čummâ kiddejui korrâ pakkâs keežild ubâ ehidispiäiván vástuppeeivi. Páihálii Ruopsis riistâ mield saajeest lijjii maaŋgâs jámálgâm teikâ šoddâm uáivijorgáldâssân pakkâs keežild. Táválávt tágáreh ulmuuh iä annaam kappeer teikâ haatâ, mii lii uáli tehelâš pakkâs ääigi.
Čuávuvái peivij meid eres kuávluh Euroopist kärttih killáđ pakkâsist: Espanja, Ranska, Saksa já meid Puola finnejeh jieijâs pakkâ pááru aldemui peivij ääigi.
Euroop liegâsvuotâulâttâs, 48,8 cekkid, mittedui Sisiliast Italiast porgemáánust 2021. Šoŋŋâtietteeh vyelgih jo ton jurdust, et vala taan keesi taat Euroop ulâttâs kirdettuvvoo historján.
Käldeeh:
– Previsioni meteo, con l’anticiclone Caronte eccezionale ondata di caldo con picchi di 43 °C anche a Roma (www.repubblica.it)
– Kaliforniassa voidaan mitata sunnuntaina maapallon mittaushistorian lämpöennätys – samalla rankkasateet koettelevat Aasian maita (yle.fi)
– 44 graden in Griekenland, Akropolis halsoverkop ontruimd (nos.nl)
Koveh: Fabrizio Brecciaroli