Wiener Zeitung -aavis almostui majemuu tove piäiválâžžân päviraavisin kesimáánu 30. peeivi 2023. Wiener Zeitung almostuuškuođij Wiennerisches Diarium -noomáin porgemáánust 1703 Nuorttâriijkâ uáivikaavpugist Wienist, mon áánsust tot lâi maailm puárásumos piäiválâš päviraavis.
Majemuu nummeer ovdâlohheest luuvâi ”320 ihheed, 12 presidentid, 10 kiäisárid, 2 täsivääldi, 1 aavis.”
Suijân piäiválii päviraavis loopâtmân lii ruttâvänivuotâ, mon tovâttij laavâ nubásmittem Nuorttâriijkâst. Cuáŋuimáánust asâttum uđđâ laavâ mield finnoduvah iä innig taarbâš mäksiđ maiden talle ko toh halijdeh pieijâđ almottâsâid päviraavisáid. Almottâsmáávsuh lijjii stuorrâ puátu Wiener Zeitung -aavisân, já toittáá aavis ij innig piergim ruđâlávt.
Lii arvâlum, et lahânubástus čuávumuššân aavis monâttij joba 18 miljovn eurod, já tondiet tot kaartâi kepidiđ pargovievâs. Aavis ceelhij luovâs ohtsis 63 parged. Ovdâmerkkân toimâttâskodde kepidui 55 pargest 20 pargei.
Puátteevuođâst aavis almostuvá tuše neetist. Ton lasseen ulmen lii almostittiđ päviraavis ohtii mánuppaajeest. Tot ij lah kuittâg vala tiäđust, kuás tot almostuuškuáđáččij.
Käldeeh:
– Maailman vanhin päivittäinen sanomalehti ilmestyi viimeistä kertaa printtinä (www.hs.fi)
– World’s oldest national newspaper prints final edition after 320 years (www.theguardian.com)
Kove: Andrys Stienstra (Pixabay)