Ive 2023 uđđâivemáánust kuovâmáánu loopâ räi lijjii Aanaar Siggávuonâst almugijkoskâsâš TV-rááiđu kuvviimeh. TV-rááiđu ”Constellation”, mon täsničaittâleijen lává Noomi Rapace (Girl with a Dragon Tattoo, Sherlock Holmes: Game of Shadows) sehe Jonathan Banks (Breaking Bad), láá pyevtittâm Turbine Studios já Haut et Court TV. TV-ráiđu lii psykologisâš triller, mast Jo-nommâsâš nissoon (Noomi Rapace) kalga puáttiđ maasâd komovuođâst Eennâmpáálu asan stuorrâ katastrof maŋa. Enâmist sun fiettee, et jieijâs puáris elimist vááilui miinii, já návt álgá jiäráskittee, sevŋis fiäráán komovuođâ já maailm syeligâs historjá čoođâ. TV-rááiđu stivrejeijen lii Michelle MacLaren, kote lii ovdil stivrim Game of Thrones-, The Walking Dead- já Breaking Bad -rááiđuid.
Kuvviimij kuávdážin tooimâi Luámukylá Lapponia Mudusjäävri riddoost, kost lijjii paijeel 200 olmožid pargoost jyehi peeivi rááiđu kuvvim ääigi. Pargeeh lijjii puáttám el. Saksaast já Stuorrâ-Britanniast já maaŋgâs lijjii meid páiháliih. Luámukylást šoodâi tego uccâ siijdâš. Jyehi áinoo láiguauto Anarist lâi väridum pargei várás, kuhes jieŋâluoddâ lâi rahtum jäävri oolâ já ylläslâš catering-irâttâs poođij Luámukylá šiiljon piemmâđ čuođijd ulmuid jyehi peeivi.
Ráiđu lâi uásild kovvejum meid Aanaar markkân alda sehe Suáluijäävrist. Luámukylá Lapponiast aalgij pargo kuvviimij várás jo syeinimáánust 2022, ko kulmâ tuve njargâkeejist koolgâi raččođ já uđđâ, stuárráb tupe huksejui tuš rááiđu várás.
Anarâš aavis lii sahhiittâllâm Kimi Seppäsii Valofirma The Light House Oy:st.
Maht eidu taat saje Sigávuonâst väljejui taan TV-rááiđu kuvvimij várás?
Mij uusâim huksimsaje TV-rááiđust kevttum tuve várás njargâkeejist jäävri riddoost logistisávt jiärmálii saajeest. Uuccâm várás mij keevtijm Google Maps, meccikárttáid, meccitipšomseervi sehe jieškote-uvlágánijd páihálijd ohtâvuođâid. Luámukylá Lapponiast lâi puoh tot, maid mij tarbâšijm.
Maggaar vuástáväldim Anarist lâi? Moh aašijd lijjii hástuliih tijjân?
Vuástáväldim lâi kale eromâš pyeri, puohah toimii suottâsávt oovtâstpargoost miiguin.
Šoŋŋâ lâi váhá polâttittees äšši mijjân aalgâst. Mij poolâim iänááš máhđulijn sälttipuolâšijn. Mist lâi lukko, ko uđđâivemáánust lâi-uv eromâš pivvâl já muotij-uv uáli uccáá. Pargei aassâmsojijguin lâi viehâ korrâ pargo. Mij usâškuođijm soojijd liijkás maŋŋeed, já mij tarbâšijm aassâmsoojijd uáli jo maŋgâsân. Taan keežild motomijn pargein lâi kuhes mätki pargosajan, ko sij karttii jotteeđ ain Suáluičielgi rääjist. Hástulâš äšši mijjân lâi meiddei stuorrâ piergâsmere jođettem Anarân Helsigist já Saksaast, sehe pääihi alne-uv Lapponiast. Pyereest vuávájum pargo keežild mij piergijm kuittâg šievnáál.
Kiergânih-uv tun jieš navdâšiđ rijjâääigist Anarist?
Rijjâääigi mun kiergânim vyeijiđ kiälháin, čierâstâllâđ sehe eelliđ Jieŋâmeerâ riddoost. Puoh taah ääših kuođđii pisováid muštoid muu vááimun.
TV-ráiđu “Constellation” puátá keččâmnáál Apple TV+ striimampalvâlusân.
Anna Askala
Kove: Fabrizio Brecciaroli