Junáh iä pyevti vyeijiđ ookon Vuáládâhenâmijn Den Bosch já Boxtel kooskâst, tastko mievrih láá kuáivum enâmijd ryevdirađe vyelni. Ryevdirađe sáttá tiippâđ mievrij pilledmij keežild, ađai tom ferttee tuvdeđ pyerebeht já ton maŋa sirdeđ enâmijd maassâd. Ovdil tom mievrih kalgeh vyejettuđ. Taat lii väädis, tastko mievrih láá rávhuidittum elleeh.
ProRail-hovdâ John Voppen iätá Omroep Brabant ‑loostân: ”Jo nube tove oho siste junáh iä pyevti vyeijiđ tondiet ko mievrih kuáivuh enâmijd ryevdirađe vyelni. Tom lii väädis čuávdiđ jotelávt tondiet ko toos tarbâšuvvoo vistig lope. Lii tehelâš mađhâšeijeid já jotteid, et mij pyehtip toimâđ jotelávt.”
Meid ekolog Bert Heese lii Omroep Brabant ‑loostâ mield ton mielâ, et junáh kalgeh vuod jođeškyettiđ nuuvt jotelávt ko máhđulâš. Sun iätá: ”Lii tehelâš suojâliđ mievrijd, mut ohtsâškode táárbuh kale kalgeh vistig valduđ huámášumán.”
Ekolog Hesse muštâl: ”Mievrih láá reeviirelleeh, moh távjá iälusteh smavvâ čaggen. Máhđulávt toh láá vyejettum mottoom eres saajeest. Uđđâ huksimprojekteh maŋgii käržideh toi eellimsoojijd.”
Tuorâstuv ProRail lii finnim virgálii love mievrij vyejeetmân, mut taat kalga tábáhtuđ peeivičuovâst, tastko mievrih láá ijjâelleeh. Taid soojijd, kogo mievrih láá kuáivum raaigijd, piäijojeh luŋkáh, moi mield mievrih peesih olgos mut iä innig siisâ. Ton lasseen ryevdirađe paaldâst kuhes syeinih láá čuoppum, mii taha kuávlu hyenebeht heivejeijen mievrijd. Vástuppeeivi kuáivummašineh kuáivuškyeteh várugávt ryevdirađe vyelni. Jis tobbeen kávnojeh mievrih, te toh váldojeh kiddâ, nohádittojeh já tuálvojeh meddâl. Täst ferttiv leđe fáárust meid elleituáhtár já ekolog. Ton maŋa rääigih ryevdirađe vyelni tiävdojeh čunnuigijn. Tastoo rađe paaldân piäijojeh viermih, moh kalgeh estiđ uđđâ raigij kuáivum.
Jis puoh mana pyereest, te puáttee ohhoost junáh vuod vyeješkyetih táválávt.
Käldeeh:
– Das zorgt voor ellende op spoor: week lang geen treinen Den Bosch-Eindhoven (www.omroepbrabant.nl)
– Dassenburcht spoor Esch wordt weggehaald, eind volgende week weer treinen (nos.nl)
– Dassen ondergraven spoor: voorlopig geen treinen tussen Den Bosch en Boxtel (www.omroepbrabant.nl)
Kove: andy ballard (Pixabay)