Ranskaast lii uđđâsist algâttum jasko ton vuástá, et iäláttâhahe pajeduuččij. Ranskaliih peesih tääl iäláttâhân 62-ihásâžžân, mut president Macron haalijd pajediđ iäláttâhave 64 ihán. Juurdân lii, et parlament tuhhiittičij nubástus taan máánu loopâst.
Almolâš jotolâh lii joskâm jotemist, škoovlah láá kiddâ, maaŋgâ saajeest lyeneh iä viežžuu já meiddei kyermiautovyeijeeh láá pargojaskoost. Oljopyevtittemlágádâsâi Esso já TotalEnergies puohtui pyevtittem lii aštum, já meiddei šleeđgah iä tooimâ tego kalgeh.
Mielâčájáttâsah láá uárnejum jo kuuđâ peeivi ääigi, já miljovneh ulmuuh láá uásálistám toid. Áámmátovtâstusah láá uhkedâm, et jaskoh sättih ain pišteđ maŋgâ peeivi, meiddei oljopyevtittemlágádâsâi já ryevdikiäinu uásild, tassaaš ko iäláttâhave pajedemiävtuttâs lii macâttum.
Pariisi taavaabeln Amiensist moottorkiäinu lii kiddejum já puoh jotteem stuorrâ ráhtálâšvuotâkuávlun lii estum. Autovyeijeeh čuážžuh luoddâpellâst jieijâs auto paaldâst.
Maaŋgah ulmuuh, kiäh kuittâg láá moonnâm paargon, tuárjuh toorjâtooimâid. Uáiviltutkâmeh čäittih, et eenâbloho jienâsteijein iä tuárju iäláttâhave pajedem.
Haldâttâs mield iäláttâhave pajedem 64 ihán lii velttidmettum, vâi puátteevuođâst-uv lii máhđulâš tähidiđ iäláttuv:
”Mun iberdâm, et ulmuuh iä haalijd porgâđ kyehti ive kuhheeb, mut tot lii velttidmettum”, iätá uáiviminister Elisabeth Borne Ranska televisiost.
Sämmilâš kirječällee já jurgâleijee Jovna-Ánte Vest oro Pariisist, kost jasko čuuvtij vaaigut. Meiddei sust lii jieijâs uáivil jaaskon:
”Kalehân návt viijđes jasko ain vaaigut táválii ulmuu elimân. Jiemge mun ibbeerd, magarij agâigijn ulmuuh láá jaskoost. Táválâš tiervâs olmooš ij lah iäláttâhavveest 62-ihásâžžân. Mun tiävdám forgâ 72, já must lii ain korrâ pargomohtâ. Toos tiäđust-uv vaaigut tot-uv, et must iä lah lamaš stuárráábeh tiervâsvuotâčuolmah”, Jovna-Ánte Vest muštâl.
Käldee:
– Staking Frankrijk: wegblokkades, treinstaking, afval wordt niet opgehaald (www.nos.nl)
Kove: Walkerssk (Pixabay)