Liegâdum pyeráluoddâ oroi vuovâs čuávdusin njalahistmij já pyeráin vieggâsâddâm estimân Vuáládâhenâmijn. Den Haag já Hoek van Holland koskâsâš luoddâ N211 tuáimá puohlágán jotolâhiiskâstmij testamsaijeen, kost uási pyeráluodâst liegâdui pocceigijn ive 2022. Juurdân lâi testađ, maht tággáár čuávdus keevâtlávt tooimâi.
Energia pyevtittui autoi vyeijim peht
Energia pyevtittui autoriggei kahheemkontaktáin, já tain energiain liegâdui poccei siste leijee čääci. Systeem toimâm lii kuittâg puáhtám testaaškyettiđ pyerebeht esken korrâsub puolâšij ääigi. Testaamij puáđus lâi, et luoddâase ij killám puolâšijd. Asfalt lii tääl maaŋgâ saajeest ráigánâddâm, já toos láá meid ittáám kyepih. Liegâdâspocceeh uáinojeh tääl päljisin.
Pyeráluodâ oornigisttuállee ij kuittâg vala ááigu hilgođ jurduu pyeráluodâi lieggiimist. ”Maadâ-Holland (Zuid-Holland) prooviins lii avžum asfalt toimâtteijee tuđhâškyettiđ, mondiet taah vädisvuođah láá šoddâm”, iätá tieđetteijee Menno Zijlstra WOS-aavisân. ”Tutkâmij vuáđuld mij meridep, tivvoo-uv asfalt vâi piäijoo-uv sajan aaibâs uđđâ asfalt”, sun muštâl.
Piäivášpanelijgijn liegâdum pyeráluoddâ
Vuáládâhenâmij vuosmuš liegâdum pyeráluoddâ lekkui Edest ive 2017. Taat luoddâ lii uássin liegâdum piäivášpanelijgijn. Meiddei taan pyeráluodâ liegâdmist láá lamaš vädisvuođah: arvešoŋŋân piäivášpaneleh šoddii njalahâssân. Tondiet uási taan pyeráluodâst kiddejui koskâpuddâsávt ive 2020. Njalahistem estee kerdi piäivášpanelij alne kuulâi jotelubbooht ko lâi arvâlum, já tom ferttij uđâsmittiđ.
Ovdláhháá Maadâ-Holland prooviins ááigui huksiđ siämmáámuđusii pyeráluodâ Poeldijk já Wateringen kooskân, mut taat haahâ ij olášum. Taat Zon op Infra -haahâ pieijui markkânáid kyevti prooviins, Tave-Holland já Tave-Brabant, ohtsâš juurdân. Infrastruktuurijd huksejeijee irâttâs BAM Infra kuittâg vuoitij kišto já uážui huksiđ piäivášpyeráluodâid Vijfhuizenân Tave-Hollandist já Wagenbergân Tave-Brabantist. Pyeráluodân Westlandist ij lam ton tove tárbu.
Käldee:
– Het blijkt helaas niet te werken: een verwarmd fietspad dat gladheid voorkomt (www.omroepwest.nl)
Kove: Amaia pascual (Pixabay)