Maadâsämmilâš museo já kulttuurkuávdáš Saemien Sijte lii väljejum Taažâ ive 2026 museon. Palhâšume juohhui aalmuglii museočuákkimist Kirkkonjaargâst cuáŋuimáánu 14. peeivi. Áinon maadâsämmilâžžân museon Saemien Sijte ‑museost lii aalmuglâš ovdâsvástádâs dokumentistiđ, siäiluttiđ já tutkâđ maadâsämmilii historjá já kulttuur ubâ maadâsämmilii kuávlust.
Tuámmárjuávhu saavâjođetteijee Bente Estil eeđâi, ete Saemien Sijte puáhtá uáinusân kieŋŋâlávt historjá, speejâld tááláá ääigi sehe paajeed uáinusân ucceeblovo jienâ já tain naalijn addel tuáivu puátteevuotân. Valjiimistis tuámáreh onnii tehálâžžân, ete museo viggá mutteđ eenâblovo jiešibárdâs já čyevvee ucceeb tubdum oosijd historjást. Sii mielâst Saemien Sijte lii inspiraatio käldee eres museoid, moh pargeh ucceeblovoi vuoigâdvuođâiguin já kolonialismáin.
Saemien Sijte ‑museo pargee Elen Kristina Utsi muštâl NRK Sápmi ‑sahhiittâlmist, ete palhâšume lii merhâšittee tubdâstâs sijjân. ”Tot čáittá, ete mii pargo lii tehálâš sehe maadâsämmilii siärvádâhân já puohháid, kiäh halijdeh puáttiđ teehin. Lii tehálâš pyehtiđ uáinusân mii historjá já kulttuur.”
Saemien Sijte lekkâsij ive 1980 Snåsast. Tááláid tiilijd museo varrij ive 2022.
Käldeeh:
− Saemien Sijte (saemiensijte.no)
− Saemien Sijte er årets museum (www.nrk.no)
− Saemien Sijte er Årets museum 2026! (museumsforbundet.no)
Kove: Orland (Wikimedia Commons)