Oovcádluokkaliih juáhhojeh matematiik tááiđui mield hyeneeht miänástuvvee, koskâmiärálávt mättee já pyereest mättee uáppeid čielgâsubbooht ko ovdil, uđđâ raapoort summee.
Vuáđuškovlâlij matematiik mättim lii hiäjusmâm majemui kyevtlov ive ääigi. Uđđâ raapoort čielgee, magareh ääših láá suijân matematiikmättim hiäjusmân. Kansallisen koulutuksen arviointikeskus (Karvi) árvu vuáđuduvá oppâmpuátusij árvuštâlmân, mii olášui digitaallávt kiđđuv 2021. Toos uásálistii suullân 12 500 oovcádluokkalâžžâd pirrâ Suomâ.
Sánáliih matematiikhárjuttâsah iä luhostuu pyereest hyenes kielâtááiđui tiet
Motomeh uáppeeh iä piergii matematiikhárjuttâsâin sänirááju vänivuođâ tiet. Hiäjus kielâtááiđu vaikuttâs oinui sánálijn hárjuttâsâin, main iäruh uáppei kooskâst lijjii stuárráábeh ko ovdil.
”Ko matematiiklâš čuolmâ lii sánálii häämist, te čuolmâ iberdem váátá, ete uáppee ibbeerd ovdâmerkkân tagarijd saanijd ko tuođânálásâšvuotâ já funktio”, iätá Karvi njunošmiäruštâllâmäššitobdee Jari Metsämuuronen.
Metsämuuronen iätá meiddei, ete ličij hirmâd tehálâš, ete jo vyelitääsist kiddejuuččij huámmášume sänirááju ovdánmân matematiik oppâm uáinust-uv.
Raapoort mield uáppei hiäjus matematiikpuátusáid vaaigut meritátulâšvuođâ vänivuotâ. Puátusáid vaaigut meiddei tot, ete uáppeeh iä lah perustum taggaar teestâst, mii ij vaaigut árvusáánán ige puátteevuođâ uáppoid.
Digitaallâš testâ hiäjusmitij meiddei puoh pyeremui uáppei puátusijd
Testâ lâi tääl vuosmuu keerdi ollásávt digitaallâš. Uáppei puátuseh lijjii hyenebeh ko ovdebij iivij, tastko hárjuttâs vaađâi visuaallii čuolmâčuávdus teikkâ vuáđustâsâid. Uáppein lijjii vaigâdvuođah ovdâmerkkân miäruštâllâđ, ete mon ennuv kulmâhááh čäähih neljiháá siisâ. Uáppei mielâst digitaallâš testâ lâi muálkkáb ko oovdeb pävirpennâtestâ.
Matematiik mättim juáhhoo kuulmâ juávkun
Jari Metsämuuronen uáiná, ete uáppei mielâst tärhis tiäđui oppâm tááláá maailmist ij lah siämmáá tehálâš ko ovdil. Sij pyehtih smiettâđ, ete ”Puoh kávnoo kale Googlest”. Matematiik váátá vala-uv paajeeld oppâm.
Vuáđuškoovlâ loppâmuddoost uáppeeh juáhhojeh matematiik tááiđui mield kuulmâ juávkun: hyeneeht miänástuvvee, koskâmiärálávt mättee já pyereest mättee uáppeid. Tooleeb mättim juáhásij täsivubbooht. Motomij uáppei matematiik mättim lii hirmâd hiäju. Sij láá enâmustáá koskâmiärálávt mättee kuuđâdluokkalii tääsist.
Karvi avžut, ete uáppeid finniiččij eenâb torjuu jo škovlâpálgá aalgâst, tastko pajetääsist lii ennuv vaigâdub pyerediđ já nanosmittiđ uáppei tááiđuid.
Sonja Valle
Käldee:
– Koululaisten matematiikan osaaminen on heikentynyt – osalla oppilaista taustalta löytyy puutteellinen sanavarasto (www.yle.fi)
Kove: Gerd Altmann (Pixabay)