Sämitigge muštâl tiäđáttâsâstis, ete saavâjođetteijee Pirita Näkkäläjärvi máccá vaanhimijriijâst vyesimáánu 12. peeivi 2026. Näkkäläjärvi paasij vaanhimijriijân uđđâivemáánust 2025. Suu sajasâžžân lii toimâm nubbe värisaavâjođetteijee Tuomas Aslak Juuso, kote juátká sajasâžžân ain vyesimáánu räi. Juuso tooimâi Sämitige saavâjođetteijen iivij 2019–2023.
Saavâjođetteijeejuávkku soovâi sajasâšorniistâlmijn vaanhimijriijâ várás juovlâmáánust 2024. Saavâjođetteijee Näkkäläjärvi ovdâsvástádâsah juáhhojii vuosmuu värisaavâjođetteijei Leo Aikion já nube värisaavâjođetteijei Tuomas Aslak Juuson. Ton lasseen värisaavâjođetteijeeh västidává tolebáá soppum ovdâsvástádâsâinis.
Vaanhimijriijâ ääigi Tuomas Aslak Juusost lii olesovdâsvástádâs. Sun västid eereeb iärrás stuárráábijn prosesijn, budjetaašijn, aalmugijkoskâsii tooimâst, sämikielâin, EU-aašijn já arâšoddâdmist.
Leo Aikio vist västid ovdâmerkkân iäláttâs-, vuoigâdvuotâ‑ já pirâsaašijn, sämimaađhâšmist, anarâšaašijn, Tiänun kyeskee aašijn já kulttuuraašijn.
Saavâjođetteijei ohtâsii ovdâsvástádâsân kuleh sämitiggelahâuđâsmittem, šoŋŋâdâhnubástus já luándulappum, tuotâvuotâ‑ já sovâdâttâmproosees sehe tave-eennâmlâš sämisopâmuš.
Käldee:
– Saavâjođetteijee Pirita Näkkäläjärvi máccá vaanhimijriijâst vyesimáánust 2026: II värisaavâjođetteijee Tuomas Aslak Juuso juátká toos räi saavâjođetteijee sajasâžžân (samediggi.fi)
Kove: Ville Fofonoff / Sämitigge