Oulu Lippo Nisoneh vuoittii pesipáálu nubben alemuu liiga Ykköspesis moonnâm oholoopâ. Fiinaalrááiđust Lippo vuástálisten lâi Hamina Palloilijat, mon Lippo vuoitij 2–0. Vuáittoin tot pajanij alemuu Superpesis-liigan.
Nisonij Superpesis lii puoh enâmustáá keččum nisonij pálustâllâmliiga Suomâst, já tot šadda mudoi-uv ain pivnohubbon ubâ ääigi. Puáttee paajeest pyeremuu nissoonjuávhu tittelist kištottâlloo oppeet tavveen-uv, ko majemui iivij tavemus nisonij Superpesis-juávkku lâi Vaasa Mailattaret.
Lippo lii spellâm Ykköspesis finalist tääl kulmii maŋaluvâi. Stuorrâ pettâšuumij maŋa vuáittu tobdoo eromâš pyerrin.
– Ko lii kyehti ive lamaš táppájeijee roolâst, te tääl mij juhlop olmânáál, iätá spellâjođetteijee Saku Alatalo.
Kapteen Iida Tossavainen muštâlij jieijâs tobdoin juávhu sosiaallii media kanavast:
– Taam mij háputtâlâim já taam mij juuvsâim. Iä kavnuu säänih, aaibâs mielâttes fiilis. Váhá teikâ jiešalnees uáli jo ennust šadda herkkin. Tuođâi fiijnâ mätki lii šoddâm tain juávhoin ubâ keesi, já mij lep ovdánâm juávkkun uáli jo pyereest.
Juávhu spellein Tossavainen, Tuija Ahonen, Jonna Heinula, Sara Kinnunen, Iiris Rautio já Venla Ronkainen spellii Superpesis-liigast Kempele Kirist, mii koočâi válduliigast paje 2023 maŋa.
Fiinaalspeelah
Vuossâmuš fiinaalspellâ spellui lávárduv, porgemáánu 23. peeivi Oulust Raksila pesipállustadionist. Speelâ aalgâst Lippo, mii algâttij olgovuárust, oroi lemin jierestum. Muádi feeilâ keežild HP finnij oovtâ kaččâm, já Lippo jieijâs vuosmuš sisvuáru vist nuuvâi uáli jo jotelávt.
Vuosmuu uási niäljád ađai majemuu vuárupaarâ aalgâst HP:st lijjii kyehti kaččâm já Lippost ohtâ kaččâm. Olgokiedist Lippo luhostui pyereest ige adelâm HP:n innig kaččâmijd. Siskiedist-uv juávkku piergij pyereest, veikkâ spelleeh lijjii-uv korrâ tedduu vyelni. Iiris Rautio čooskij já Karoliina Soppela kaačâi Lippo táásá, já Sara Kinnusii časkemist Linda Kemppainen puovtij vuosmuu uási vuáittukaččâm.
Nube uásist Lippo speelâi ložžâsávt 1 628 päikkikeččee oovdâst. Tot finnij 5 kaččâm, vuástálistee vist ij oovtâgin. Nuuvt Lippo vuoitij vuosmuu speelâ 2–0 (3–2, 5–0). Nube uásist kyehti kaččâm čoskijn vildáásčaskeeh Aino Kesti já 16-ihásâš Saana Kälkäjä. Rautio čooskij já puovtij oovtâ kaččâm. Kapteen Tossavainen puovtij kyehti kaččâm, já Soppela já Kemppainen kuohtuuh puovttijn oovtâ kaččâm.
Nubbe spellâ spellui jo čuávuváá peeivi masa 600 km keččin Haminast Vallikenttä-kiedist. Spellâ lâi uáli jo täässiv. Vuosmuu uásist časkee–kaččee-paarâ Mira Heikkilä – Kiira Yrjänen tuálvoin päikkijuávhu njunošân. Kuálmád vuárupaarâst Lippo kuittâg peesâi njunošân, ko Rautio–Heinula já Kinnunen–Soppela uárnejii Lippon kyehti kaččâm. Eenâb kaččâmeh taan uásist iä oinum.
Nube uásist Kesti–Kemppainen adeláin Lippon tállán oovtâ kaččâm. Nube vuárupaarâst HP finnij kuittâg kyehti kaččâm, main västidii Nea Forsell – Krista Piirainen sehe Riina Hallikainen – Annika Utriainen. Speelâ já fiinaalrááiđu čuávdus šoodâi aaibâs majemuu vuárupaarâst.
Sisvuárust Lippost lijjii jo kyehti puálu ovdilgo Kesti puovtij Heinula päikkipiäsán. Nuuvt uási lâi táásá 2–2, ko HP algâttij jieijâs majemuu sisvuáru. Päikkijuávkku tarbâšij oovtâ kaččâm, vâi spellâ jotkuuččij supervuárupaarân. Lippo pehtilis olgokieddi selvâttij kuittâg HP vollitmijd oovtâi oovtâi, ige HP peessâm ko ohtii kuálmád piäsán. Čuávdee kuálmád puálu šoodâi talle ko HP spellee čooskij ovdâlavâttemes časkem majemuu časkemijnis. Spellâ nuuvâi 0–1 (1–2, 2–2). Tastmaŋa Lippo keevtij Hamina päikkikiedi jieijâs miäštárvuotâjuuhlij várás.
Lippo eres speelah
Nisonij Ykköspesis lii juohhum kyevti uásádâhân. Taveuásáduv vuáđuspellârááiđu vyeittee Lippo teeivâi niäljádâsfinalist siämmáá uásáduv niäljád juávhu ađai Alajärvi Ankkurit. Lippo vuoitij tom viehâ čielgâsávt kyevti speelâst. Vuossâmuš nuuvâi 2–0 (3–0, 4–2) Raksilast já nubbe vist 0–2 (3–5, 1–5) Alajärvi Saltex Areenast.
Pelifinalist Lippo vuástá poođij maadâuásáduv Siilinjärvi Pesis ađai SiiPe. Lippo vuoitij vistig Oulust 2–0 (3–2, 7–3). Nube speelâst Manttu kiedist Siilinjärvist päikkijuávkku oonij ävkkin Lippo feeilâid vuosmuu uásist (4–2). Nube uásist Lippo vist penttâ tuššâdij SiiPe (1–23). Supervuárupaarâ spellui táásá 1–1, mutâ pááikánčaskemkištoost Lippo lâi pyereeb (3–4) já ovdánij finalân.
Hamina Palloilijat -juávhust, mii vuoitij maađâuásáduv vuáđuspellârááiđu, lii vala máhđulâsvuotâ pajaniđ Superpesis-liigan. Tot spiällá Superpesis 11. juávhu vuástá já paijaan Superpesis-liigan ton sajan, jis vuáittá. Taan ive 11. juávkku lii Laitila Jyske, mii vuoitij Lippo moonnâm ive Ykköspesis finalist 2–1. Hamina Palloilijat jieš speelâi Superpesis-liigast poojij 2023 já 2024.
Simo Kiri lii Laapi eennâmkode njunošjuávkku pesipáálust
Nisonij Superpesis-liigast Oulu Lippo vuoitij miäštárvuođâ iivij 1994 já 1995. Meid almai liigast Lippo vuoitij miäštárvuođâ iivij 1994 já 1998. Ovdebáá keerdi Oulust spellui nisonij Superpesis-liiga ive 2019 já almai Superpesis-liiga ive 2018. Oulu lii tavemus kieldâ, mii lii vuáittám Superpesis miäštárvuođâ.
Laapi eennâmkoddeest puoh pyeremus pesipállujuávkku lii Simo Kiri, mii taan ive poođij ovcádin almai Ykköspesis-liigast. Kiri čaalij historjá ive 2018, kuás juávkku pajanij vuossâmužžân lappilâžžân juávkkun almai Ykköspesis-liigan.
Pesipáálu Superpesis já Ykköspesis juávhuh mulsâšuddeh viehâ ennuv. Suijân taas láá ovdâmerkkân ekonomâliih vädisvuođah, moi keežild juávhuh ferttejeh luoppâđ liigasajestis. Návt keevâi eereeb iärrás Oulu Lipottaret -juávkun, mii kaartâi vyelgiđ Superpesis-liigast oovtâ paje maŋa ive 2018. Čohčuv 2022 Oulu Lippo Nisoneh ađai Raksilan Likat Ry juáđhiškuođij Lipottaret-juávhu tooimâ.
Käldeeh:
– Lippo Naiset Ykköspesiksen mestariksi ja Superpesikseen! (www.superpesis.fi)
Kove: Valtteri Valkeapolku