Pariisi mađhâšeijeemereh láá olláám ulâttâslovvoid taan ive, mut massaturismist lii siämmást šoddâm kaavpugân nuáđi. Moonnâm ive aldeláhháá 49 miljovn turistid kolliistâllii metropolkuávlust, já taan ive lii vyerdimist joba love prooseent lasanem. Maađhâšmist västideijee išepormiäštár Frédéric Hocquard váárut nuorbâsijn, kátukove muttuumist já Pariisi ässei tutâmettumvuođâst, já tääl kaavpug raijiiškuát mađhâšem.
Massatuuriism uáinoo ovdâmerkkân toin naalijn, et ärbivuáváliih bistroh já smavvâ purrâmuškäävpih láppojeh, já toi sajan puátih luksuspuuvdah já tivrâs suklaapuuvdah. Ässei kierdâvâšvuotâ lii nuhâmin eromâšávt Montmartrest já Le Marais’st, kost váidoo, et Pariisi lii muttuumin ”Disneylandin”. Tile taha viärráábin olympialij monnjâvaikuttâs, mii lii lasettâm mađhâšeijeemeerijd. Eromâšávt Aasiast, Aldanuorttân, Amerikist já Euroopist puátih ennuv turisteh. Uđđâ mađhâšeijeepuolvâ lii nuorâb ko ovdil, já tot ocá ijjâeellim já makkuuttâs. Ovdâmerkkân stuorrâ konserteh já muotiohoh tevdih hotellijd tállân.
Kaavpug stivrâ viggá tääl stivriiškyettiđ tuuriisttulve pehtilubbooht. Tot lii raijim kyessimeerijd Eiffel-toornâst já Louvrest, já Notre-Dame kirkko lii váldám anon muneväärridmijd já liipuid. Meiddei Airbnb-njuolgâdusah láá čavgejum ive 2025 aalgâst toin naalijn, et aassâmviäsuid puáhtá laiguuttiđ 90 peivid ivveest ovdij 120 peeivi sajan, já meid viäsui laiguuttem kocceem lii čavgejum. Ulmen lii raijiđ tuuriistlaiguuttem já estiđ kaavpugässeid kyeskee lááigui pajanem já aassâmkuávlui kuorânem.
Frédéric Hocquard mield Pariisi ij innig ááigu markkânistiđ jieijâs, pic tot viggá stivriđ tuuriism čovgâdubbooht. Hocquard halijdičij ovdâmerkkân kieldiđ tuuriistbuusijd kaavpugist. Staatâväldi ij lah kuittâg miettâm toos.
Käldee:
– Parijs waarschuwt: ’Stad loopt vast door te veel toeristen’ (nos.nl)
Kove: Sgroey (Wikimedia Commons)