Tiervâsvuođâ já pyereestvaijeem lájádâs THL lii meridâm vijđediđ puŋkkipuáhuttâsohjelmis uđđâ riskâkuávloid Suomâst. THL tiäđáttâs mield uđđâ riskâkuávluh láá Espoost, Kirkkonummist, Uusikaupunkist já Hailuotost.
Tärhibeht ollâ riskâkuávluh láá Espoo Kauklahti postânummeerkuávlu Kurttila já Vanttila kaavpuguásih, Kirkkonummi Porkkala já Upinniemi postânummeerkuávluh, Hailuoto sehe Uusikaupunki Pyhämaa postânummeerkuávlu. Täin kuávluin ässeeh tâi mudoi kuhesáigásávt orroo ulmuuh uážžuh TBE-puáhuttâs nuuvtá uássin puáhuttâsohjelmist.
Ton lasseen jieškuástidlâš puáhuttâs avžuuttuvvoo tääl puoh luándust jottee ässeid Oulu Kaakkurist sehe Kemiönsaarist já Pyhärantast Varsinais-Suomâst.
Puáhuttâs suoijâl puutijâšvuoiŋâškudduumist ađai TBE:st. TBE lii virustavdâ, mii njuámu puuŋki käskim peht. Suomâst puutijâšvuoiŋâškuddum vuáttoo eromâšávt riddo- já suáluikuávluin. Riskâkuávluh pyehtih leđe uáli jo rájášum já kääržih. Ovdâmerkkân tiätu aassâmkuávlu, ovtâskâs suálui teikkâ jävririddokuávlu sáttá leđe riskâkuávlu. Puáhuttâsohjelmân ovdil lasettum riskâkuávluh siäiluh tego táássáš-uv. Riskâkuávluh kávnojeh THL kárttáheiviittâsâst.
Aalmuglii puáhuttâsohjelm riskâkuávlu kriterin lii itteem, mii kalga leđe paijeel 15 tábáhtussâd per 100 000 olmožid viiđâ ive čuávumist. Taan lasseen tábáhtusah kalgeh leđe maŋaluvâi leijee iivij ääigi aiccum, já tábáhtusâi meereest kalga oinuđ lasanem ääigi mield.
Roovvâdmáánu 2023 já čohčâmáánu 2024 kooskâst Suomâst vuáttojii 200 uđđâ puutijâšvuoiŋâškuddumtábáhtussâd. Enâmustáá tábáhtusah iivij 2020−2024 lijjii Kustavist, Paraisiist já Vuáskuenâmist.
Puŋkkipuáhuttâs lii kuullâm Suomâ aalmuglii puáhuttâsohjelmân ive 2006 rääjist.
Käldee:
– Maksuttomat punkkirokotukset laajenevat uusille riskialueille (yle.fi)
Kove: Erik Karits (Pixabay)