Čuovâuáivi peivikirje – hyenes luho keesi lii nuorâiroomaan, mon Jeff Kinney lii čáállám já kuvvim. Kirje lii algâalgâlávt čallum eŋgâlâskielân. Eŋgâlâskielâlâš kirje almostui roovvâdmáánu 12. peeivi 2009. Tot lii niäljád kirje siämmáánommâsii kirjerááiđust. Fabrizio Brecciaroli lii jurgâlâm kirje anarâškielân, já Anarâškielâ servi lii kuástidâm tom. Anarâškielâš kirje almostui juovlâmáánust 2023.
Kirje muštâl Greg Heffley kesiluámust. Piäiváš páštá já luándu hokâttâl, mut Greg halijdičij tuše čokkáđ pääihist keččâmin televisio já spellâmin videospeelâid. Greg lii-uv taggaar ”sisolmooš”, kiän mielâst pyeremus vyehi viettiđ keesi lii láškuttâllâđ jieijâs pääihist, ráávhust njuolgâdusâittáá já kenigâsvuođâittáá. Taat ij kuittâg luhostuu kuhháá. Forgâ Greg huámmáš, et sun lii fáárust jieškote-uvlágánijn aktiviteetijn. Toi ääigi tábáhtuveh maaŋgah hepâšuttee já hävskis ääših, moh finnejeh lohhee povvâstiđ njálgáht. Greg uáinust puoh tobdoo tiäđust-uv kavhâdin, mut eidu tondiet maainâs lii nuuvt hävski.
Maainâs álgá, ko Greg iirât velttâliđ eenis vuáváámijd. Sun keksee-uv puohlágánijd koonstâid pisottâllâđ pääihist já velttâđ ahevis peerâaktiviteetijd. Greg muštâleijeejienâ lii ain tievâ sarkasmist. Taat taha mainâsist makkuutteijee, mut tyellittälli Greg sáttá leđe liijkás negatiivlâš. Sun lii távjá erduu já uáiná aašijd hyenes čuovâst. Nube tááhust taat kulá suu persovnân, já maaŋgâs pyehtih identifisistuđ toos. Puohah iä lijkkuu kiäsán teikâ peerâaktiviteetáid, já Greg oovdâst pyereest taam uáinu. Suu vyehi uáiniđ maailm lii kuittâg humoristlâš, já tondiet kirje lii puohnâssân keppâ luhâmuš.
Kirje teevstâ tievâsmiteh ráiđukovenálásiih sárguseh, moh láá jiešvuođâliih Kinney stiijlân. Sárguseh já tekstâpuljâreh iä lah tuše hervân, pic toh láá tehálâš uási mainâsist. Toh pyehtih uáinusân Greg jurduid já tábáhtusâi koomisâšvuođâ. Sárgusij já tekstâpuljârij áánsust kirje lii älkkees luhâmuš meiddei tagaráid lohheid, kiäh iä táválávt luuvâ hirmâd ennuv.
Veikkâ Hyenes luho keesi lii uáli jo hävskis kirje, te tot ij faalâ stuorrâ olâttâsâid rááiđu ovdebái oosij lohheid. Juonâ lii viehâ siämmáálágán: Greg aargâst láá jieškote-uvlágáneh čuolmah, maid sun ij määti čuávdiđ, já loopâst ääših maneh mahtnii endurân. Taat puáhtá tubduđ kiärdumin, jis lii luuhâm rááiđu eres kiirjijd. Nube tááhust taat uápisvuotâ sáttá leđe eidu tot suijâ, mondiet rááiđu fanih rähisteh täid kiirjijd. Toh fäälih torvolii já uápis makkuuttâs.
Kirje teemah, tegu peerâ, skipáreh já kesiluámu vuárdámušah, láá älkkeht iberdetteeh puoh lohheid. Mainâs huumor suápá pyereest jyehiahasáid lohheid. Párnáid kirje tábáhtusah láá häävskih. Rävisulmuuh vist povvâsteh, tastko sij identifisistojeh vaanhimij roolân.
Hyenes luho keesi lii pyeri lasattâs Čuovâuáivi peivikirje -rááiđun. Tot ij veltihánnáá lah rááiđu puoh pyeremus uási, mut tot lii uáli hitruus luhâmuš, mii povvâstut čuuvtij já lasseet luuhâmmoovtâ. Kirje suápá eromâšávt tagaráid ulmuid, kiäh halijdeh povvâstiđ já vájáldittiđ uánihis puudân argâeellim murrâšijd. Greg luhottemes kesifeeriimeh pyehtih vissásávt moje lohhee poksâmáid.
Kove: Fabrizio Brecciaroli