Staatârääđi lii mieđettâm 60 000 eurod Anarâškielâ siärván Anarâš aavis várás. Ruttâdem luávdá ive 2024 koloid. Anarâškielâ servi lâi uuccâm 80 000 eurod. Staatâtoorjâ lâi jyehimnáál 500 000 eurod.
Taan ive Anarâš aavis ij lah áinoo sämikielâg pyevtittâs, mii lii finnim ruttâdem. Kaleva365 Oy/Lapin Kansa lii uážžum 56 000 eurod tavesämikielâlii Ságat-uási várás.
Ruttâdem láá finnim meiddei čuávuvááh ruotâkielâliih loostah já seervih:
- KSF Media almostittem Västra Nyland -lostâ: 85 000 eurod
- KSF Media almostittem Östnyland-lostâ: 85 000 eurod
- Natur och Miljö rf almostittem Finlands Natur -nettilostâ: 20 000 eurod
- Understödsföreningen för Nya Östis rf: 33 000 eurod
- Tigern rf almostittem Ny Tid -nettilostâ: 20 000 eurod
- ÅU Media almostittem Pargas Kungörelser -lostâ: 56 000 eurod
- ÅU Media almostittem Åbo Underrättelser -lostâ: 85 000 eurod
Ruttâdem puáhtá finniđ ruotâkielâg uđâspalvâlus sehe taggaar aavis teikâ lostâ, mii almostuvá mottoom Suomâst sarnum ucceeblovokielân ađai tavesämikielân, anarâškielân, nuorttâlâškielân, kärjilkielân, romanikielân teikâ seevvimkielân. Ton lasseen torjuu uážžuh uuccâđ tagareh suomâ- teikâ ruotâkielâliih aaviseh, moh pyevtitteh sämi- teikâ kärjilkielâg siskáldâs.
Ruđâi uuccâm uáinust aavis tâi loostâ ferttee peividiđ ucemustáá kulmii ohhoost. Taan räi Anarâš aavis lii peividum aainâs-uv vittii ohhoost, mut siskáldâs várás láá korrâsub vátámâšah: fáárust ferttejeh leđe meid uáivilčalluuh, sahhiittâlmeh já njunoščalluuh sehe blogih. Ton lasseen uđđâsij jurâttem páihálii tääsist ij pijsáá ađai ferttee čäälliđ meiddei Suomâ aašijn já aalmugijkoskâsijn aašijn sehe tagarijn aašijn, moh kyeskih ovdâmerkkân ekonomian, tiettui, valastâlmân, kulttuurân já politiikân.
Käldee:
– Vähemmistökielisen sanomalehdistön tuki vuonna 2024 (valtioneuvosto.fi)
Kove: Marco (Pixabay)